uMthunywa
LUYAPHAMBILI udaba lwethu ngoKhumalo ongutitshanhloko esikolo seTotololo. Kakho esikolo uKhumalo njalo ababalisi abangaphansi kwakhe kabalazi iqiniso lokuthi ungaphi. Lokhu kubangelwa yikuthi kakhulumanga iqiniso lakumsekeli wakhe uVundla nxa ezipha ikhefana elifitshane. Lokhu kwenza abathanda izindaba njengomunye wababalisi uDickson Nkomo bafanisele ukuthi ungaphi umdala uKhumalo.
Befanisela besenzenje oDickson Nkomo, bafaka lamanga kulokho abakukhulumayo ngoKhumalo. UKhumalo laye wazikholisa ngoba omunye walabomama ababelethisa umkakhe uMaNdlovu ababona ukuthi kwakuzelwe isilima wehluleka ukugcina leyomfihlo.
Lanxa uKhumalo wayebaphe isivalamlomo wehluleka ukuzibamba uMaKhuphe waluchathekela oDickson Nkomo lolo daba. UDickson sihlangana laye eluveza kuMzamo Dube omunye wababalisi ababefundisa bonke, bengaphansi kukamdala uKhumalo.
UDickson uyavuma ukuthi lokho ayekutshela uMzamo kwakuyikuhlinzela uKhumalo odakeni okwengcuba. Uyazibula uDickson ngalokho ayesekwenzile ngoKhumalo. Singakedluleli phambili siyabona bafundi ukuthi umlobi usebenzisa ukuthi abalingiliswa bakhe kube yibo abethula udaba kunye lembono yabo. Lokhu kwenza udaba lwakhe lube lamandla nxa ulubala ngoba luveza kahle ikakhulu isimilo somuntu.
UMzamo Dube kasindoda leyana ethatheka lula. Kavumelani lalokho okukhulunywa nguDickson yikho sezwa ngeviki ephelileyo ethuka isalukazi leso uDickson ayesithi wezwa ngaso ukuthi koKhumalo kwakuzelwe isigoga.
Wasisola kakhulu uMzamo leso salukazi ethi bathi sidlalela ebhawa yeMacansini, khonale eDemugudu, lapho esidakwa khona size sizikhohlwe. Waveza amanga esabekayo uDickson ethi sokubelethwe lolo sane uKhumalo wathi izalukazi lezo ziluklinye.
Ngamanga aluhlaza lawo ayekhulunywa nguDickson. Into esingakabi leqiniso layo okwakhathesi yikuthi kambe uMaKhuphe nguye owayeqambe amanga ukuthi ngubani owayethe usane lolo kalubulawe? UDickson usehamba eqamba amanga ethi uKhumalo nguye owaletha umbono wokuthi isigoga leso kasibulawe.
UKhumalo nguye owathi umntwana uzaphila wametha ibizo ethi Nkosiphile. Lamhlanje uDickson usehamba esithi utitshanhloko ngumbulali, kakho esikolo ngoba ulenhloni zokubulala.
Esihlangana lakho lapha yikuthi kubi ukungakhulumi iqiniso sisukela lakuye umdala uKhumalo owehluleka ukuthi atshele amatisha asebenza ngaphansi kwakhe iqiniso okwenza osomangase oDickson bafanisela ukuthi kungabe kusenzakalani emzini wakhe.
Ukungagcini imfihlo lakho kuyingozi ngoba nantu udaba uKhumalo owathi kafuni luphumele ngaphandle komuzi wakhe lwaseluthutsha ngamanga langeqiniso.
UDickson wayekhuluma okungamanga leqiniso. Kwakuliqiniso ukuthi kwakuzelwe umntwana oyisigoga koKhumalo. Kwakungamanga ukuthi uKhumalo wayethe izalukazi ezabelethisa uMaNdlovu zihle zilubulale lolo sane.
Okwenzakalayo yikuthi lezo zalukazi yizo ezafisa ukuluklinya lolo sane kodwa uMaNdlovu wala kanti loKhumalo laye uzakuthi umntwana kaphile lanxa kwakumkhathaza kakhulu emoyeni.
UDickson uyayinonisa indaba yakhe kuMzamo ewahutshuza amanga ethi umdala uKhumalo wayengasamthandi umkakhe lokuthi bahlanganise amathe uthi, “Kwaba sobala nje ukuthi, uKhumalondini, uyamsola kakhulu umfazi lo ngento ayemenzele yona phakathi kwesigodi.”
