uMthunywa
YiNtatheli kaMthunywa
ABABALISI abalolonga abantwana abagijima ezikolo sebekhuthazwe ukuthi basebenze gadalala ukuthi baphakamise ithalenta ukuze kubunjwe ikusasa elihle kwezemidlalo.
Lokhu kuvezwe ngusaziwayo kwezemfundo kuleli, osekela ithalenta lomdlalo wokugijima ilizwe lonke uClemence Kunzekweguta.
UKunzekweguta ongusomabhizimusi omkhulu kunkampani yeZero Suppliers ubatshazwa kakhulu ngokusekela imidlalo yokugijima ezikolo zemfundo yaphansi ezabelweni zakoBulawayo, eMatabeleland North laseMatabeleland South.
Uthe abantwana besikolo abaphatheka kumncintiswano wokugijima kumele labo bancintise ngokukhululeka besazi ukuthi balosekelo. Ubike ukuba inkampani le izimisele ukuthi iqinise ubudlelwano bayo lenhlanganiso yabaphathisikolo eyeNational Association of Primary Heads, iNaph.
“Siyajabula ngokuthi isizini yomdlalo wokugijima isifikile. Sijabuliswa yikuthi sincedisa lezikolo ezisemaphandleni. Inkampani yeZero Suppliers ayithandabuzi ukubika ukuba lonyaka ikhona njalo izasekela kumncintiswano wokugijima ezabelweni zeMatabeleland,” kutsho uKunzekweguta.
Usomabhizimusi lo, owaziwa ngothando lwakhe lokufundisa abantwana, ikakhulu emaphandleni, uthe uzimisele ukuncedisa ngakho konke okungafunwa yizikolo lenhlanganiso yazo iNaph.
Uthe kuqakathekile ukuthi kwakhiwe ubudlelwano obuhle phakathi kweNaph lezinye inhlanganiso ezisebenzelana lezikolo.
“Izikolo zona zizakutsho ukuthi zifuna sizincedise ngani. Silinde ukuthi basitshele kuphela.
“Inhloso yethu ngeyokuthuthukisa umdlalo wokugijima. Sikhangelele ukuphakamisa abantwabethu abalesiphiwo sokugijima. Yonke into iqala phansi ngakho lethalenta lokugijima kumele libanjwe lisakhula.
IZero Suppliers ilinde ukusekela ithalenta lezemidlalo ngaso sonke isikhathi,” kutsho uKunzekweguta.
Kulandela ukusekela umdlalo lo okweminyaka eminengi, sekuphume intshantshu ezilesiqubu esimangalisayo esezimele iZimbabwe kumincintiswano yaphezulu.
