uMthunywa
kuloba uCornelius Luphahla
MTHWAKAZI ondlela zimhlophe kule iviki siphethe indaba esivamile kulezinsuku eyokuthi kulezinsuku sekhona amadoda okuthiwa kalanzalo. Lokhu kwakuyinhlaka yotshani ekadeni akula owayekwazi ukuthi kulendoda okuthiwa ize ife ingelamntwana ngapho ithethe.
Lokhu sokusenzakala kulezinsuku ngoba abantu abasathembakalanga njalo abasezwani emdenini. Ekadeni ilizwe lisakhile ibe ingekho indoda engelamuli ngoba oMandulo bebekhaliphile okumangalisayo. Babekwazi ukuthi kwenziwani nxa ufuna ukuqinisa umuzi wendoda.
Kwakuthi nxa indoda ingathatha ihlale lomkayo kuze kweqe umnyaka bengelamntwana abadala bahle babone ukuthi kunuka santungwana. Lapho-ke babeqala ngokuhlolisisa kumalukazana lo ukuthi ngabe uhlupho lukuye yini?
Lokhu kwakusenziwa ngokuhlolwa amasale ukuthi aqunywe nxa elawo.
Ngemva kwale imizamo nxa kutholakale ukuthi umalukazana kalahlupho kulokho babeqala ukuphekela indoda imbiza eqotho. Lapha-ke kwakuthi bengayiphekela imbiza le yehlule njalo amakhehla omdeni lo ayibizele eceleni ayinathise iqanda lenkukhu eliluhlaza. Nxa indoda le ingelanzalo yayibonakala ngokuhlanza. Ingenza njalo amakhehla la ahle athi yetshwa!
Lapho-ke ayabe seyibonile imfumba lapho ephakwe khona. Sebezaqala-ke ukuzama amacebo ngokuthumela udadewabo wendoda le kumkayo ngudlu bayexoxisana ngokuthi umnawakhe womkakhe engangena njani endlini laye ukuze bathole umntwana. Laye umalukazana wayehle avumele phezulu ngoba emthanda umkakhe njalo esazi ukuthi ngeke baphile bonke nxa bengela bantwana njengoba indoda ingavumi ukuthi yiyo engelanzalo.
Ngemva kwalokho abadala bomdeni bazakhulumisana lomnawakhe wendoda le engelanzalo ukuthi kufanele azame icebo lokuqinisa umuzi womfowabo. Laye lapho esizwa lelo wayengathandabuzi kwakuhle kumjabulise lokhu njengendoda. Kuzahlelwa-ke ithuba lokuthi athole isikhathi esihle sokuhlangana lomalukazana lo.
Ekuhlelweni kwalesisikhathi kwakusenziwa amaqhinga athile awokuthi indoda le ithunywe kweyinye indawo ukuze umnawawo asale engena kuhle endlini yayo. Kwakuvame ukuthi athunywe kwezinye izihlobo ezikhatshana okuhanjwa khona amaviki angaba mabili. Uhamba nje ulomunye umuntu omdala walo umdeni okwaziyo lokhu kodwa ongasoze akhulume lutho. Bazahamba-ke baze bayefika abaya khona baphuze ukuphenduka.
Kwakuthi kunjalo indoda le ihambe iphiwe imbiza kuthiwe kumele ibhince ingubo okweviki ezimbili inatha umuthi lo kuzathi mhla ibuya ibe sithamekile. Benzenje abadala besazi ukuthi zindlela zokuthi ingamangali nxa umkayo sezithwele izitshele ukuthi yiyo khona kungumnawayo.
Ekuhambeni kwabo lapha kuthiwa kwakunanzelelwa ukuthi umalukazana usanda kuphuma emazibukweni ukuze abambe kuhle isisu. Lapho-ke umfana uzasala ehlezi kuhle senguye ubaba walapha endlini kodwa wenza lokhu ebusuku kuphela kuthi emini afihle okokuthi ngeke kwabonwa muntu.
Mhla indoda le iphenduka izabe sifile ngenkengane njengendoda ethetheyo ihle yembathele indlala. Kube njalo-ke kanti sokukudala umkayo esithethe isisu. Njengoba kuzabe kutshiyene kancane nje ukuthathwa kwesisu lesi lokufika kwayo akufi kwabonakala ukuthi umntwana lo kasowale ndoda.
Kowesibili umntwana umnawayo uzangena ngeyinye njalo indlela ikakhulu nxa umnewabo eyedinga inkomo. Lokhu kwakuhluphe esikhathini esinengi nxa ijaha leli selithethe. Umkalo engakunanzelela lokhu uyabe sehlala eyilandela indoda yakhe engafuni lokuyinika ithuba lokuya noma ngaphi.
Njengoba abadala bethi zidla belindile, kwakungehluli lokhu ngoba umalukazana lo olendoda engalanzalo wayesuka ekhaya kuthiwe uyebona oyisekazi kanti zindlela zokuvala lo omncane. Ekuhambeni kwakhe umnawakhe womkakhe lo uzasuka laye esiya enkomeni kanti uqonde ukuyakwakha umuzi womnewabo.
Kuzenziwa njalo-ke lize liyephela ithumbu indoda le ize iyekufa ingazi ukuthi abantwana bonke asobayo. Noma nje indoda le ingenza umkhuba wokuhlola ivezandlebe kodwa wayengeke wafa umntwana ngoba engowekhaya.
Yikho-ke ngithi ekadeni yayingekho indoda engela nzalo. Khathesi amanye amadoda aze ayekufa engelabantwana kumbe elabantwana bemzini kuphela. Lokhu kwakungekho izolo kusadliwa ngoludala.
Ungaxhumana lomlobi ku 0775722298 kumbe kuWhatsApp ku 0737771317.
