uMthunywa
Kuloba uCornelius Luphahla
NJENGOBA sesihlangene njalo kwezokuphathwa kwezamasiko, bakaMthwakazi kule iviki sizake sithinte udaba olulukhunyana okuvame ukuthi lukhathaze abanengi baphethe sebephelelwe yizifuyo kanye lezimali zabo bezama ukululungisisa.
Angithi nje kakho othanda ukuthi nxa elele abe ephupha abantu abangasekho kulo umhlaba. Kunjalo bakwethu, vele akujabulisi ukuphupha abantu asebadlulayo kulo umhlaba ngoba kwenza lobuthongo bakhona bunyamalale.
Kukhona njalo abanye abantu abaphakathi kwelitshe lembokodo ngenxa yokuthi izihlobo zabo ezabhubhayo ziyapoka zingena legumeni. Lokhu-ke kwakuthi nxa kusenzakala kube kulokuganga okuthize okwenzakalayo ngokufa komuntu lo. Ukuganga lokhu kungabe yikuthi ukhona emdenini owaba lesandla ekufeni kwakhe kumbe yena umufi angabe wafa engakhululekanga kumbe egangele omunye umuntu wasembulala.
Kunjalo ye, kodwa khona abadala babethi nxa umuntu epoka kufanele ayehlupha lowo owambulalayo hatshi abantu abamsulwa nje. Ngalokhu-ke nxa umufi ehlupha emdenini njalo umdeni ungazi lutho ngokufa kwakhe kwakusetshenzwe ethuneni lakhe ekuseni kusasempondo zankomo ukuze angaphindi ahluphe kuleliguma.
Ukusetshenzwa lokhu kwenziwa ngumuntu omdala emdenini lo njalo angakwenza kuhle kutshabalale konke akade bekubona emdenini ngenxa yomufi. Lapha-ke indaba yokusetshenzwa lokhu ngizayicezula kancane ngiyitshiyele abadala njengalokhu kuthiwa inyoni itshayelwa abadala.
Ekulungisweni lapha umuntu omdala emdenini uyasuka ntambama ayexoza amaxolo esinye isihlahla engingeke ngasibetha ngegama. Amaxolo la uwaxoza empumalanga kanye lentshonalanga yaso qede awafake emganwini wesikhuni athele amanzi esiziba ngenkezo. Angenza njalo uzaqunta njalo ihlamvu lechithamuzi alifake emanzini la asemganwini wesikhuni.
Angakwenza lokhu uzawuthatha umganu lo awulalise phezulu kwethuna likamuyi kuthi ekuseni kusempondo zankomo avuke aqonde khona. Esikhathini esinengi kwakuthi nxa umuyi epoka lo ayolungisa lokhu atshayisane laso isibane sakhe sesibuyela ethuneni lakhe njengoba kuyabe sokusisa. Yikho nje kuvame ukuthi olungisa lokhu ahambe labanye abazamela bucwadlana ngesikhathi elungisa.
Ekufikeni kwakhe ethuneni lapha uzawuthatha umganu lo akhulume ebiza igama likamuyi emkhuza ukuthi kabuyele lapho abulawa khona angaze wakhathaza umdeni ongelacala. Ukhuluma nje ebiza amagama abantu bonke abalo umdeni abakhala ngaye. Angenza lokhu uzachithela amanzi asemganwini lo kanye lamaxolo lehlamvu leli phezulu kwethuna likamuyi.
Ngemva kwalokho uzasuka lalabo akade bemlindele baqonde ekhaya bengazange banyemukula. Ukunganyemukuli lokhu lizaba lokuthi umuyi angaphindi ahluphe futhi noma ngubani olilunga lalo umdeni. Ngokwesiko kukholelwa ukuthi kungaba khona ozathalaza ngesikhathi sokuyiwa ekhaya umuyi lapha uzahlupha yena yedwa njalo kwakube nzima ukuthi kulungisiswe lokhu. Yikho nje esikhathini esinengi olungisa loluhlupho kuvame ukuthi ahambe yedwa ngoba ewazi kuhle umkhuba kanye lesiko lokulungiswa kwaloluhlupho.
Lwalulungiswa njalo-ke loluhlupho endulo bakaMalandela kodwa kulezinsuku balutshwana abakwaziyo lokhu njalo okunengi ngeke ngakuveza lapha njengoba babengasomi oMandulo nxa babethi injobo enhle isikelwa ensitha ithungelwe ebandla.
Mlobi siyabonga kakhulu umsebenzi wakho osenzela wona owokuvuselela ezamasiko ngakho sithi qhubekela phambili usikhuthaza ikakhulu kubontanga. Mina isicelo sami yikuthi ungichazele ukuthi ngingenza njani ngoba ngihlala ngiphupha abazali bami ababhubhayo behlezi lami angathi bayaphila. Sengizame endaweni ezehlukeyo ngithi mhlawumbe bazangilungisela kodwa kuyehlula. Clifford Mathe, Gwanda.
Siyabonga mlobi umsebenzi wakho osenzela wona muhle sithi qhubekela phambili. Mina ngicela ukwazi ukuthi ngingenza kanjani ngoba umkami uhlala ekhonona ethi ngiyaqanda emzimbeni kangimjabulisi. Ngisize mlobi ngoba umuzi wami ungachitheka. Sibonokuhle Khanye, Nkayi.
Mlobi sithi qhubeka ukhuthaza ngezamasiko ngoba zivuselela ubuzwe bethu. Mina okwami yikuncoma umsebenzi owenzayo ngikhuthaza lentsha ukuthi iwuthakazelele ngoba uveza ubuyithi bethu. Mlindeli Mkhwananzi, Tsholotsho.
Ungaxhumana lomlobi ku 0737771317 kumbe ku 0775722298
