uMthunywa
EKADENI izwe lisakhile oMandulo babethi nxa umntwana esedlulise iviki ezelwe uzwe izalukazi lamaxhegu ziqale manje ukugebha imithi yokulwelapha inkanda kanye leminye imikhuhlane etshiyeneyo.
Angithi nje esiNtwini kukholelwa ukuthi umntwana nxa esanda kuzalwa abantu abanengi basuka bamgadle okokuthi nxa ungamelaphanga ungasala ubambe umoya.
Kwakuthi nxa kunjalo umntwana etheswe inkanda ngezihlahla okuyikuyiqinisa ukuthi ingaze yawela noma ehlangane labanye abantwana abetheswe ngendlela yokuwisela abanye. Angithi nje lakudala babekhona abantu ababegangile besethesa abantwababo ngezihlahla eziwisela abantwana babanye. Ababesenza lokhu babeyabe besenzela ukubizwa bezokwethesa lo osewele inkanda ukuze bathole inkukhu yesibongo noma nje kwakungabongwa kabanzi.
Ekukhuleni komntwana ayisibo bonke phela abakhula ngendlela enhle kungelahlupho. Kwesinye isikhathi wawusizwa kuthiwa umntwana lijejelume. Umntwana onjalo ngoqale ukutshena ngamazinyo aphezulu. Abadala babethi nxa enjalo bahle bamgudle umntwana lo amazinyo la abuyele phakathi kusesabelwa ukuthi engaluma omunye umntwana kumbe umuntu emdenini wakhe kukhona oyabe ezakufa.
Abaziyo bathi ungabona umntwana enjalo kutsho ukuthi kukhona esinye isitha ngaphandle esifuna ukungena ngomntwana lo ngoba sehluleke ukuzingenela sodwa. Lapha-ke nxa kunjalo bathi abomdeni bengayekethisa amazinyo omntwana lo aze akhule uyaphela umdeni wonke ngaye. Indlela ayabe eseluma ngayo abanye kuyabe sokuveza sobala ukuthi kazenzi ufuqwa ngulo owamthumayo. Noma kunjalo lokhu kuyalungiseka ngendlela yokugudla amazinyo la ngezinye izihlahla ezithile kanye lezinye indlela ezenziwa nxa umntwana lo sekhulile.
Okunye njalo kwakuthi umntwana nxa ethe esasemncane wahlaselwa ngumkhuhlane wenyoni abanye bathi ngowabantwana othola ukuthi umntwana lo uyabe esiwa yedwa akhiphe udenda ngomlomo langamakhala.
Umkhuhlane lo uyingozi kakhulu ngoba kukholelwa ukuthi umntwana onjalo engawa atshe, nxa sevukelwe ngumkhuhlane lo kasili futhi. Angithi nje umkhuhlane lo wenza umuntu abe angathi usangene kancane njengoba uyabe umfikela nje.
Umntwana onjalo akaze wadla inhlobo zonke zenyoni kanye lamaqanda akhona. Lokhu kungenxa yokuthi umkhuhlane lo kukholelwa ukuthi uvela enyonini abathi ngunzembe, ijuba elifana lomkhombazana kodwa lilomsila omnyama. Ngalokhu abanye babethi nxa beselapha umkhuhlane lo bathatha umntwana lo bamfake emkulwini kuthi nxa besokusithi umalumakhe aphakamise uthungo olukule indlu kuvuleke isikhala kuthi unina amkhiphe egwililini ngaphansi kwaloluthungo.
Ekukhitshweni komntwana lo unina nguye omkhiphayo kuthi amukelwe ngugogo wakhe phandle komkulu. Kukhona njalo okwenziwayo ngemva kwalokhu okuyikho okuxotsha umkhuhlane lo ngoba nxa kungasenziwanga njalo ukwelapha lokhu kuyabe kungaphelelanga. Kukhona njalo ezinye indlela zokwelapha umkhuhlane lo noma nje ezinye zakhona ziwuthundubeza nje zingawuqedi.
Kukhona njalo ukuthi umntwana umthole elentamo etshekileyo lakho kwakuselatshwa lokhu ekadeni. Indlela yokwelapha umntwana lo kwakusetshenziswe ihloka kuphela njengoba kukhumbulelwa ukuthi kudalwa yikuthi uyise womntwana uyabe wayethanda ukuthwala inhloka. Ngalokhu-ke bahle bakubize ngokuthi umntwana ulehloka.
Abanye abantwana bazalwa bahlaselwe ngumkhuhlane wesibhono ikakhulu labo abalezibhono ezinkulu. Umntwana onjalo uthwala nzima sibili aze akhule abe ngumuntu omdala nxa engasalatshwanga kuhle esasemncane. Nxa kunjalo umntwana lo babethathe ithuku elikhulu emqubeni baphume lomntwana ngaphandle komuzi ugogo wakhe athathe umhlanga asike umntwana lo isibhono ngaphansi kwaso laphezulu kwaso kancane kuphume igazi. Ngemva kwalokho uyasika njalo ithiku leli liphume igazi lalo elingamanzi.
Leligazi ugogo uyalithontisela lapho asike khona umntwana abuye athathe igazi lomntwana alininde lapho asike khona ithuku qede abuyisele ithuku leli esibayeni. Ugogo lapho ubuyela lomntwana ekhaya engaze wanyemukula.
Nxa sokunje umntwana lo kaphindi akhale ngesibhono futhi ngoba siyabe sesilatshwe lithuku leli lahamba lomkhuhlane lo phansi njengoba ithuku lesibhono kubunjwe okufanayo ikakhulu isibhono esikhulu.
Yikho-ke ekadeni okwakusenziwa ebantwaneni nxa bekhula ngendlela yokwelapha imikhuhlane etshiyeneyo elokhe ihlasela abantwana lakhathesi. Ngalokhu-ke minengi imikhuhlane ehlasela abantwana kodwa imikhuhlane le yonke iyelapheka ngokwesiNtu sakoMthwakazi.
