uMthunywa
Kuloba uCornelius Luphahla
BAKWETHU kwakube kuhle ukuthi sike sikhumbuzane ngendaba ezimnandi zasendulo kanye lendlela okwakuqhutshwa ngayo eminye imikhuba ephathelane lempilo kanye lenhlalo yabatsha. Angithi nje kwakukhona umkhuba wokuphehlelwa isithundu ikakhulu nxa kukhona lapho ofuna ukuya khona okudingakala inhlanhla.
Isithundu lesi angithi akukhathalekile ukuthi siphehlelwa bani, kungaba lijaha kumbe intombi. Ukuphehlelwa isithundu yindlela yokuxotsha umnyama emuntwini asale lenhlanhla ukuze lapha aya khona kungabi lamathunzi amnyama.
Emantombazaneni kwakusenziwa nxa intombi isisiya ekwendeni kumbe ijaha nxa lisiyadinga umsebenzi kumbe lisenzela ukuba lenhlanhla ikakhulu ekutholeni intombi. Isithundu lesi sasiphehlelwa ngokomkhuba waso njalo senziwa ngeziphunzi ezehlukeneyo.
Kwesinye isikhathi isithundu sasiphehlelwa intombi engakhonjiswayo ukuze imthole umaqondana wayo. Izihlahla ezibumba isithundu kukholelwa ukuthi kazingenelani lamathunzi amnyama ziyawasusa. Ngalokhu intombi engakhonjiswayo kuthiwa iyabe yetheswa ithunzi elimnyama abadala babethi yisidina.
Kunjalo lejaheni kwakuthi ungalibona lingakhonjwa kuyabe kukhona amathunzi amabi alilandelayo. Kwesinye isikhathi intombi ungayibona ingakhonjiswa kumbe ijaha ungalibona lingakhonjwa selikhulile kuyabe kukhona olilalisa lenyamazana. Inyamazana le kuthiwa ngundofa ngakho usuka atshiye umnyama kuthi nxa kuyintombi amajaha ayifanise lenyamazana. Kunjalo lanxa kulijaha amantombazana asuka alifanise lenyamazana azwe engelathando lalo. Konke lokhu kususwa ngokuphehlelwa isithundu.
Ngokomkhuba isithuthu siphehlelwa umuntu ntambama ilanga lisanda ukutshona kumbe selibekezela. Esiphehlelwa ngalesisikhathi ngesentombazana eya kwenda ikakhulu nxa kungayisikho khatshana kakhulu lapho ephelekezelwa khona okokuthi kayisoze ifike ebusuku. Kwakuthi nxa kukhatshana kakhulu iphehlelwe ekuseni kodwa nxa kulijaha livame ukuphehlelwa ntambama.
Isithundu lesi senziwa ngokuhlanganisa izihlahla ezinengi njalo nxa kuyintombi yayiphehlelwe ngumnewabo kumbe umalumayo. Ejaheni khona kuvame ukuphehla umalumalo kumbe uyisemkhulu.
Izihlahla ezazisetshenziswa nxa kuphehlelwa isithundu kwakuyisithundu ngokwaso (isitatambo), uduze wegusu, uvelabahleke, umlomomnandi, uduze wegusu, inama, ukhalimela, ingwaqela, ingobamakhosi, undwendwe, umathanjana, injobo kanye lobhodisa.
Izihlahla lezi zizafakwa enqayini kumbe eqhageni khonapho zisegangeni. Kuthathwe lowo ophehlelwa isithundu uzafaka iqhaga leli ekhanda lakhe kuthi onguye omphehlelayo athathe uphehlo lwesihlahla somvalasangwana aqale ukuphehla.
Uphehla nje udiwo kumbe igula lisekhanda lalowo ophehlelwayo. Uzaphehla ke kuze kuphuphume amagwebu agcwale emzimbeni walowo ophehlelwayo abe manzi te. Amagwebu la abanye babethi ayaluma kuthi abalezibindi bayawaqiniselela.
Ngemva kokuphehlelwa lokhu ophehlelwayo uzasuka aqonde ekhaya engazange wanyemukula. Lapha ayakhona uzahamba enjalo lobumanzi lobu ngakho kukholelwa ukuthi yinhlanhla le ayabe eyiphethe ngomzimba wakho.
Inqayi kumbe iqhaga kuzasala egangeni lapha kuze kuyethathwa ngemva kwamalanga athile. Ngalokhu kuqhutshwa komkhuba lo kuthiwa nxa kungoya emendweni uzahamba elenhlanhla enkulu njalo kakho ongamdelela kumbe amphathe kubi emendweni.
Mlobi ngithemba uphilile. Mina ngingumama oleminyaka engu-60 ngilokubonga okukhulu ngosizo owangiphathisa ngalo ngokungichazela ukuthi ngingenza kanjani ukuze inkomo zami zihambe ndawonye njalo zingasabuyeli lapho engazithenga khona. Ngilethemba elokuthi lalezo engingakazithathi ngingazenza lokhu engakwenza lezi ezikhona zizafana lazo. Ngalokhu isicelo sami yikuthi ungisize ngomthuso wokuthi zizale kakhulu. Kezi.
Mlobi mina ngithanda ukubonga umsebenzi wakho osenzela wona ngokuloba ngezamasiko. Mina ngingumama olomntwana oyedwa njalo ngendile kodwa kuyehlula ukuthi ngibe lomunye umntwana. Isicelo sami yikuthi ungichazele ukuthi kungabe kubangelwa yini njalo ngingenza njani ukuze ngithole omunye umntwana. Sithembinkosi Mlotshwa, Number 6, Bulawayo.
Ungaxhumana lomlobi ku WhatsaPp 0737771317 ku 0775722298.
