uMthunywa
Kuloba uCornelius Luphahla
SIZWE sikaMthwakazi lina bezinyane lesilo, njengoba bethi liphuma lendaba litshona lendaba ngakho kule iviki sizake siphathaphathe eyinye njalo indaba eluhlupho ebantwini. Angithi indoda yindoda ngenxa yabantwabayo njalo umfazi laye uba lesithunzi nxa elemuli yakhe. Kunjalo-ke kodwa kayisibo bonke abaphila emhlabeni abalabantwana.
Ukuswela inzalo lokhu kudalwa yizinto ezinengi ezehlukeneyo kungakhathalekile ukuthi uyindoda kumbe ungowesifazana. Uhlupho lolu kodwa luvame ukunindelwa abesifazana ngoba kayikho indoda evumayo ukuthi kayilanzalo.
Kwabesifazana kwakuthi intombi ingaya emazibukweni isasencane isalukazi siyivale njalo ekuyivaleni kwaso kasiyibikeli lutho ngitsho lodiwo lolo esilusebenzisayo kasilutshengisi muntu. Kwakube ngumnyama-ke kwabanye isalukazi esimvalileyo sife singakamvuli kuhle kube yikuqala kwendaba.
Lapha-ke nxa kungasatholakalanga ingadlangadla yesanuse esinganuka size siyefukula udiwo lolo akulalutho olungalunga. Lapho-ke umntanabantu angaze ayezifela engakwazi ukuya emazibukweni njalo umntwana emzwela komakhelwane.
Okunye njalo kukhona abaswela inzalo ngenxa yokuba belamasale. Amasale la zinyama ezimila ebuntwini bowesifazana ngakho kuthiwa nxa umuntu elawo ngeke wamthola umntwana ngaphandle awaqumise. Ukuqunywa kwawo-ke kwenziwa yizalukazi njalo kwenziwa ngesineke ngoba kuyingozi, kungambulala umuntu nxa kuqunywe kubi.
Isilumo laso ngomunye njalo umkhuhlane odala ukuthi owesifazana angatholi inzalo. Lesi ngesiyabe sesixhwalile ngakho siyelatshwa kusasemasinya. Ukwelatshwa kwaso kudinga impuphu yophoko kumbe eyezimba lemfe kuhlanganiswe lempande zotshani okuthiwa yinsikani kanye lezinye izihlahla ezimbili ezejwayelekileyo kuzulu.
Lapha-ke intombi iyaphekelwa ilambazi ezalidlela ukuliqeda. Ekudleni lapha kulemikhuba eminengi eyenziwayo engingeke ngayibalisa kodwa ungakwenza lokhu uyabe usumelaphile olesilumo.
Kukhona njalo okungenza umuntu aswele inzalo ikakhulu nxa kwenzakale esasemncane. Angithi nje kuthiwa intombi kumbe ijaha lingalunywa yingwenya lingelatshwa kaliyitholi inzalo. Lokhu kuliqiniso sibili ngoba kwakuthi nxa umuntu wakhona engasatholanga okwazi iziphunzi zokumelapha aze ayekufa engelamntwana.
Lapha-ke kulendaba sibili ngoba abanye basuka bakutshaye indiva lokhu balimuke sokonakele. Ngemva kokuba ijaha kumbe intombi ilunywe yingwenya kuyathathwa ubulongwe bayo buhlanganiswe lamanzi alesosiziba alunyelwe khona, kuthathwe iqanda leqhude eliqala ukukhonya nxa kulijaha elilunyiweyo. Ngemva kwalokho kuzathathwa induku zabafana, umfanuzacile kanye lezinye njalo izihlahla engingeke ngazibalisa lapha.
Izihlahla lezi zizahlanganiswa-ke omelaphayo amsebenze ikakhulu esilondeni leso alunywa khona. Ukwelatshwa lokhu kwenziwa kungakabi lesikhathi eside umuntu lo elimele ngoba kukholelwa ukuthi umkhuhlane wokuswela inzalo lo ungabe usumemetheke umzimba wonke.
Kukhona njalo eyinye indlela yokwelapha olunywe yingwenya ukuze athole inzalo eyokusebenzisa ifotsholo etshisayo. Indlela le yiyo elula kakhulu kodwa iyasebenza sibili kakhulu okokuthi ngeke uzwe kuthiwa kwehlule ukulapheka nxa usebenzise yona. Ngokunjalo ngeke ngayicazulula kabanzi ngizamana ngiyitshiyele abadala.
Kunjalo-ke bakwethu yikho nje kwakungavamanga ukuthi uzwe kuthiwa kulendoda kumbe umfazi ongelanzalo endulo. Babekhaliphile oNdukuzibomvu amajaha omkhonto.
Siyabonga kakhulu mlobi ngendaba zakho ezimnandi osibhalela zona kuSigiya ngoludala ngoba lathi akade sisemnyameni kwezamasiko sesilolwazi kokunye. Ngalokhu isicelo sami yikuthi uqhubekele phambili usifundisa ngezamasiko ungadeli ngoba uvuselela amasiko ethu. — Nkulumane, Johannesburg, South Africa.
Mlobi ngithemba uphilile. Ngiyabonga umsebenzi lo osenzela wona owokusisiza ngendlela zokwelapha ngokwesintu. Isicelo sami yikuthi ungilayezele ukuthi ngenzeni ukuze ngikhuthale nxa ngithe ngahlangana lowesifazana ngoba ngilivila, iqolo kalivumi kodwa ngisasemutsha. Ngileminyaka engu 28. — Brighton Ndlovu, Johanesburg, South Africa.
Ngithanda ukubonga umsebenzi omuhle osenzela wona owokusikhuthaza ngezamasiko maviki wonke. Isicelo sami yikuthi ungisize ngokuthi ngenze njani ngoba ngilomntwana oyintombazana oleminyaka engu-18 osehlala elandelana labafana, nxa ngimkhuza uthi uzazibulala. Ngalokhu ngicela ukwazi ukuthi endulo babesenziwani abantwana abanjalo kanye lokuthi kungabe kudalwa yini lokhu. — Sikhangezile Mathe, Ntepe, Gwanda.
Mlobi ngithi qhubekela phambili ngomsebenzi lo osenzela wona owokuvuselela ezamasiko ngoba uyasithuthukisa njengesizwe sakoMthwakazi. Ngalokhu ngicela ungichazele ukuthi nxa ngihlala ngiphupha ngithandelwe yinkalakatha yenyoka kutshoni ngoba sengikhathele ngaleliphupho. — Bekezela Nkala, Lupane.
Mlobi siyabonga umsebenzi lo owokuvuselela isizwe samaNtungwa, isicelo sami yikuthi lisakaze iphephandaba likazulu ikakhulu ezikolo ezisemakhaya ukuze intsha ithaphe uluju lolu olulobayo. — Albert Nyoni, Tsholotsho.
Ungathintana lomlobi ku 0775722298 kumbe ku whatsapp 0737771317.
