‘Sicela usekelo’- De Jongh

08 Oct, 2020 - 00:10 0 Views
‘Sicela usekelo’- De Jongh Hendrik Pieter de Jongh

uMthunywa

YiNtatheli kaMthunywa
UMQEQETSHI weFC Platinum uPieter de Jongh usebeke isikhalazo kuHulumende esokuthi iqembu lakhe livunyelwe ukuthi lilolonge lihlangane nanko isisondele imidlalo yeCaf Champions League.

IFC Platinum ilungiselela ukuyancintisa kumqhudelwano weCaf Champions League ngenyanga ezayo. Ngenxa yokuvalwa kwenguqu kusenqatshelwa ukumemetheka kwe-Covid-19, amaqembu awavunyelwa ukuthi alolonge ngobunengi babadlali.

Kungumbono ka de Jongh ukuthi iqembu lakhe livunyelwe ukuhlangana ngoba angeke liyencintisa linqobe nxa lingazange lilolonge. Amanye amaqembu akumqhudelwano lo kubikwa aseqalise ukulolonga ehlanganise abadlali.

Umqeqetshi weFC Platinum uthe iqembu lakhe lisalele emuva.

Okwamanje abadlali beFC Platinum balolonga ngamunye ngamunye kodwa umqeqetshi ukholwa ukuthi kumele abahlanganise ukuze abonisise.

Iziphathamadla zaleliqembu zazisa inhlanganiso yeZimbabwe Football Association ukuthi ithimu inikezwe ithuba lokuthi ilolonge ndawonye.

IZifa lokhe ingakaphenduli, ngemva kwenyanga yacelwa.

“Sidlalela isizwe kunkezo ye-Champions League ngakho kumele sithole usekelo kuHulumende,” kutsho lumqeqetshi esethula imbono yakhe ngamalungiselelo emidlalo yeCaf.

Sacina ukuhlangana njengeqembu ngenyanga kaMbimbitho. Esikucelayo yikuthi siphiwe imvumo yokuthi abadlali bahlangane silungise iqembu.”

Imzamo yokuxhumana lenhlanganiso yeSport and Recreation Commission yehlule. Isikhulumi seZifa uXolisani Gwesela kazange adobhe ucingo ngesikhathi iphephandaba likazulu lidinga ukwazi isinqumo salinhlanganiso ngamalungiselelo emidlalo yeFC Platinum.

Share This:

Sponsored Links