uMthunywa
Nkosilathi Sibanda
SEKUSUKUMA uthuli enkundleni zemalokitshini akoBulawayo nanko amaqembu omdlalo wenguqu kuligi yeZifa Division One, kumhlubulo welizwe asengena kuviki yesibili kumkhankaso weligi.
Akukabi lokunengi okukhangelelwe kumidlalo le ngoba kusemasinyane ukucubungula izinga lomdlalo okhona kulisizini loba nje bekulezinye ezicacise ukuthi zilolonge zaphelela ngekhefu.
Umcubunguli wezemidlalo koBulawayo uPrince Sigabade Mhlanga uchaze ukuba ngesimo samaqembu kumidlalo yakuqala, kuvele ukuba umdlalo ka-Division One ulakho ukuletha intokozo enkulu.
“Asilindeleni ukuqhubeka kwemidlalo. Esikunanzelele kakhulu kumidlalo yakuqala yikuthi kukhona okumele amanye amaqembu akulungisise ikakhulu nxa ehlose ukwenza kuhle. Kodwa, okwakhathesi asibe lokubekezela, sibone ukuthi abaqeqetshi basiphatheleni,” kutsho uMhlanga, ophinda abe yisazi se-Sports Science kwelinye lamakolitshi koBulawayo.
Kumaqembu avule isizini ngoMgqibelo, iqembu lakuqala eliveze ukuzimisela kwalo ngele-Mainline elihlohle amabhola amathathu phezulu kweMakhandeni Pirates, eliqede liphethe iqanda kumdlalo obusePlumtree ngoMgqibelo.
IMainline ngelinye lamaqembu ahlala eqalisa kakuhle isizini kodwa nxa sekubangwa kumaviki alitshumi kusiyaphambili, liyehluleka ukuthi liqhube ngegiya elifanayo.
Angene agaxwa entanjeni lakweminye imidlalo ebalisa iTalen Vision enqobe nge 2-0 kumdlalo wayo leRatanang enkundleni yeLuveve.
Ebuzwa ngokudlala kweqembu lakhe, umqeqetshi we-Adachi uPhilani “Beefy” Ncube uthe usalinde okunengi.
UNcube uthe loba benqobe umdlalo wabo le-Ajax Hotspurs, kazange akhwabithe indlela isitha sabo ebesihlele ngayo umdlalo.
“Bekungumdlalo onzima. Vele akukho lula ukudlala labanye abaqeqetshi,” kutsho uNcube ekhuluma lentatheli kaMthunywa.
I-Adachi inqobe nge 2-1.
Impumela yemidlalo ngeviki lakuqala:
Ajax Hotspurs 1-2 Adachi, Ratanang 0-2 FC Talen Vision, Bosso90 1-0 DRC, CIWU 1-1 Casmyn, Mosi Rovers 2-0 Mountain, Zimbabwe Saints 0-0 ZPC Hwange, Mainline 3-0 Makhandeni Pirates
— @NkosieLegend
