uMthunywa
Yintatheli kaMthunywa
NXA ungumsekeli weZiqholo zeZhwane ungahle ube lethemba lokuthi iqembu leli lizatshibika njalo kuligi ephakemeyo eyePSL ngomnyaka ozayo.
ITsholotsho FC ibaleke kancane kuhloka lokugamula amathimu avoxe udaka kuPSL kulisizini. Ithimu le idle iHwange 1-0, yazitholela imiklomelo ebikade ifuneka ukuthi isuke kumaqembu aphansi.
Khathesi, njengoba sekusele imidlalo emithathu ukuthi isizini iphele, iTsholotsho layo isizakhanya kunguqu ngoba phela sekuyiyo ithimu esikhangelwe ngabanengi.
ITsholotsho izitshaya isifuba ngalokhu.
ULizwe Sweswe umqeqetshi wabafana beZhwane, uyaziqhenya ngokuzimisela kwabadlali bakhe kumzamo wabo wokusila ukudlala enkundleni zePSL kulisizini.
Umqeqetshi lo uthe abalandeli bethimu bengakhathazeki ngoba iqembu labo lisasekhona kuPSL. ITsholotsho isiqanse yathola imiklomelo engu-29, itshiye ezinye ezikungozi yokuxotshwa ngaphansi ngemiklomelo emithathu kuphela.
USweswe uthe uyazi ukuba ithimu ihlalele evalweni ngenxa yokuthi kumele inqobe kuyo yonke imidlalo eseleyo.
Kumidlalo elandelayo Iziqholo zeZhwane zidibana leChicken Inn, iHighlanders kanye leHarare City.
USweswe usebike ukuba abalandeli beTsholotsho abakhuze uvalo ngoba abafana bakhe betshengisa ukuba bazenza ngcono.
Ekhuluma ngemva kokuba abafana bakhe bedobhe imiklomelo yonke kuHwange uSweswe ubike ukuba ulethemba lokuthi abafana bakhe bazadlala ngokuzimisela ngoba besazi ukuthi ikusasa yeTsholotsho iphethwe yibo.
“Njengokutsho kwami ukuthi abafana bami basadinga ukujayela ukudlala enkundleni ezigcwele abalandeli, ngilethemba bazathatha imiklomelo yonke kumidlalo esilayo.”
USweswe ubike ukuba abalandeli beTsholotsho abangapheli umoya ngoba abafana belakho ukubajabulisa.
“KuPSL kunzima kodwa kumele ubone ukuthi lapho okumele uthole khona imiklomelo ungayidlalisi ngoba uzayidinga,” kuchaza uSweswe.
Abalandeli balithimu bathi ngemidlalo eseleyo kuzakhanya ukuthi Iziqholo zeZhwane ziyayazi kakhulu inguqu.
“Lonyaka ngumnyaka weZiqholo zeZhwane wokuthi zingasuki kuPSL. Akula okungasibuyisela emuva kumkhankaso wethu lo,” kutsho uSweswe.
USweswe uthi kungasi kusebenza gadalala kwabagadli lokuvimba kwabafana abatshibilika emuva, umkhankaso wabo ubuzakuba ngumthwalo onzima.
“Ithimu ihlangene iyahlohla okuyikho okufuneka kumaligi la okuthiwa mancane.Kusukela kunozinti size siyefika kubagadli abadlali bonke basebenza gadalala,” kutsho uSweswe.
Kusukela kudala kubikwa Iziqholo zeZhwane zazisaziwa ngokuthi liqembu lamadoda kuzwa, abadlali abadinga ukunqoba ngaso sonke isikhathi.
Imbali yalo isukela ku-2005 lapho lithimu eyaqala idlala inguqu yobungane kumaligi ezidakwa.
Ngemva kokunanzelela ukuthi banengi abafana abalethalenta eqenjini, inkokheli zayo zakubona kufanele ukuthi bangene kuDivision 3 ngo2006 okwenza kwabalula ukuthi babhaxabule amanye amathimu baphakame baye kuligi ephezulu. Avuleka amathamsanqa kubadlali baleliqembu ngoba ithimu yahle yathola usizo kusomabhizimusi omkhulu wakulindawo uMandla Manyathela.
Ithimu le loba ifisa ukuthi ihlale kuligi yePSL, ihlutshwa yikuthi iyehluleka ukusebenzisa inkundla yayo.
