uMthunywa
Nkosilathi Sibanda
UKUMISWA umsebenzi kancane kukaNhlanhla Bahlangene Dube sekuvule umkhandlo kwabasakhulayo emahofisini aleliqembu nanko sekuvele ukuba umaqhuzu omutsha sekunguRonald Moyo.
UMoyo, oleminyaka yokuzalwa engu-30, loba kuthiwe abambe isikhundla sikamaqhuzu okwamanje, wenze isimanga ngokuphatha lesi isikhundla. Akula obecabangela ukuthi iBosso ingaba lethemba lokunikeza uMoyo lesisikhundla.
UDube, kubikwa uthethe ikhefu kancane, kulandela ukucetshiswa zinkokheli zeqembu ukuthi ayephumula ngekhaya.
UMoyo ngokuqhatshwa kwakhe kuBosso, ungumphathi wezokuphuma kwembiko lokuxhumana eqenjini.
NgoLwesithathu emini, umgcinisihlalo weHighlanders uJohnfat Sibanda ubike ukuba ngempela uMoyo nguye osengumaqhuzu.
Ronald Moyo
Kuncwadi yakhe, uSibanda uthe: “Ngazisa amalunga eqembu labasekeli lomphakathi ukuba umaqhuzu uNhlanhla Dube usekhefini.
“Esikhundleni sakhe kuzabamba uRonald Moyo (Isikhulumi sethu). Silethemba lokuthi amalunga ethu, abalandeli labasekeli bazakwamukela lokhu,” kubika uSibanda.
Kusenjalo, iqembu leBulawayo Chiefs lizwakala selithole umqeqetshi omutsha ovela ePortugal uNilton Terroso.
UTerroso ungene esikhaleni sikaThulani Sibanda owaxotshwa ngenyanga edluleyo.
Loba ihofisi yezembiko kuBulawayo Chiefs ingazange ithole isikhathi sokukhuluma lephephandaba likazulu ngoLwesibili emini, kudingwa ngalolu daba, abafakazi abaqotho kwezenguqu bayakuveza bengafihli ukuba kuliqiniso lokhu.
