Sebeyithanda kakhulu iWhite City

14 Mar, 2024 - 00:03 0 Views
Sebeyithanda  kakhulu iWhite City

uMthunywa

Innocent Kurira

KUYAVELA ukuthi kuzo zonke inkundla zokugijima ezikhona kuleli, abaphathi balumdlalo sebethanda ukusebenzisa iWhite City koBulawayo.

Phose maviki wonke sekubuthanwa kulinkundla kuqhutshwa imincintiswano yezikolo kunye laleyo edibanisa abadala abagijima kumazinga aphezulu.

Inhlanganiso ephethe umdlalo lo kuleli eyeNational Athletics Association of Zimbabwe (Naaz) kayikufihli ukuthi iyasuthiseka ngesimo salinkundla ngoba ingcono kakhulu kulezinye. Ukubatshazwa kwenkundla yeWhite City kuqiniswa njalo langokuqhutshwa kwemincintiswano yaphezulu ebalisela lo olandela kumaviki amabili azayo oweNational Open Championships, mhlaka 30 Mbimbitho.

INaaz inikeze amandla wokuphatha umjaho lo kunhlanganiso yeBulawayo Athletics Board (Bab). Umgcinisihlalo wenhlanganiso le, uWatson Madanyika ukuqinisekisile lokhu ngesikhathi ekhuluma lentatheli yeZimpapers Sports Hub ngoLwesibili emini.

“Siyakubona sonke ukuthi imijaho yaphezulu isiqhutshwa emzini omkhulu wakoBulawayo. Eqinisweni yikuthi labagijimi bethu kuleli bayayithanda inkundla yeWhite City. Ngokunjalo, sibika ngokugcweleyo ukuthi inhlanganiso enkulu eyeNational Athletics Association of Zimbabwe (Naaz) isiphe imvumo yokukhokhela ukuqhutshwa komncintiswano weNational Open Championships, mhlaka 30 Mbimbitho,” kubika uMadanyika.

Uthe okwenza umncintiswano lo ubemkhulu yikuthi uzasetshenziswa ukukhetha labo abazaqhubeka besiyancintisa ku-African Senior Championships, World Junior Championships laku-African Union Region 5 Youth Games.

“Sijabule kakhulu ngokuza komncintiswano lo ekupheleni kwenyanga. Umncintiswano lo yiwo ozakwenza kubelula ukuthi senelise ukuncedisa abadlali abenze kuhle ukuthi baqhubeke baye ku-Africa Senior Championships, World Junior Championship kanye le-AUSC Region 5 Games.

“Njengabaphathi, sesiqalisile ukusebenza nzima ukwenzela ukuthi umncintiswano lo ubelempumela enhle.”

UMadanyika uthe ukubhalisa ukuphatheka kumncintiswano lo kuzavalwa mhlaka 24.

Kuzancintiswana kumijaho ye100m, 100m 110mh, 200m, 400m, 400mh, 800m,1500m,3000m, 5000m, 4x100m relay, 4x mixed relay, ZITF Coca-Cola Four Minute Mile challenge, long jump, triple jump, high jump, javelin,  shot put le-discus.

Share This:

Sponsored Links

Survey


We value your opinion! Take a moment to complete our survey

This will close in 20 seconds