uMthunywa
Ibhulekifasi yikudla okudliwa ekuseni abantu besanda kuvuka. Yikudla okuqakathekileyo ebantwini laba abaya emisebenzini eyehlukeneneyo enzima lelula, abaya ezikolweni ezikhatshana leziseduze, abelenhambo ezibasa khatshana leduze abahleziyo emakhaya labo bonke laba bayalidinga ibhulekifasi ukuthi libaphe amandla.
Okhokho labo babesazi ukuthi kuyimfanelo ukuthi kudliwe ekuseni iSilayilo sebhulekifasi. Bona babesidla inkobe ezilele ziphekiwe kumbe lokunye ukudla okusele kudliwa kusihlwa lokhu okwakubizwa kuthiwa ngamalaja. Kodwa ngokuqhubeka kweminyaka basebesidla ilambazi jinge bethi ngelabantu abagulayo (umphungo).
Lamuhla ngizakhuluma ngokuphekwa kwamalambazi ehlukeneyo langendlela ezehlukeneyo.
1. Ilambazi lempuphu yophoko
Okudingakalayo
– impuphu yophoko elingana imuli yakho
– isawudo elilingeneyo
– itshukela ngokuthanda kwakho
– uchago
– imajarina ngokuthanda kwakho
– imbiza lophini
– idobi ngesilinganiso sakho
– ilemoni
Ukupheka
– Bilisa amanzi ngembiza.
– Thatha impuphu yophoko uyifake emanzini aqandayo uyihlanganise ibeyinhlama.
– Ithele emanzini abilayo ugoqoze.
– Thela isawudo wekele kuxhwathe okwemizuzu engamatshumi amathathu.
– Faka imajarina letshukela lelemoni uxhwathise okwemizuzu emihlanu kuphela. Lapho-ke usungasebenzisa isilinganiso sakho setshukela.
Ukudliwa
Phakulula nje kudliwe kusatshisa, kuthi laba abafuna ukufaka idobi bazifakele loba uchago kumbe ilemoni.
2. Ilambazi lempuphu yamabele
Okudingakalayo
– impuphu lakho konke okudingakaleyo elambazini lophoko.
Ukupheka
– Dlana njengelambazi lophoko.
3. Ilambazi lempuphu yomumbu
Okudingakalayo
– impuphu yomumbu
– konke okudingakeleyo kulambazi lophoko lamabele, yikho okufunekayo
Ukupheka
Pheka njengokupheka ilambazi lophoko lamabele.
Dlala ngokufananayo.
4. Ilambazi elimunyu lempuphu zonke
Okudingakalayo
– impuphu loba ngeyani elingana imuli yakho
– amanzi atshisayo alingana ukwenza inhlama
– isawudo lemajarina
– itshukela elilingeneyo
Ukupheka
– Qala ngokubilisa impuphu lamanzi atshisa okunganeno kumbe yinhlama ebuthakathaka.
– Yekela kubile kungathatha insuku ezimbili lawe uzobona ngokukhukhumala kwenhlama.
– Bilisa amanzi ngembiza.
– Nxa esebila, hlanganisa inhlama ubusugwaqela.
– Goqoza kuze kuxhwathe okwemizuzu engamatshumi amabili emlilweni olingeneyo.
– Faka imajarina ngesilinganiso sakho.
– Faka njalo itshukela. Uliyekele lixhwathe okwemizuzu emihlanu.
Nanzelela:
Abanye bafisa ukuthi bazifakela itshukela emiganwini yabo nxa sebesidla.
Amanye amalambazi.
Lingathenga impuphu isemaphaketheni. Wena pheka ulandela lokhu okutshiweyo ungaphambanisi ngoba kungaba yimboza, njalo uqede konke lokudla okwakha umzimba. Sidlela ukuthi sakhe imizimba eqinileyo sivikele lemikhuhlane.
