uMthunywa
Ulude
ULUDE ngeminye yemibhida esayiphiwa nguNkulunkulu. Imila emafusini ekuqaliseni kokuna kwezulu ikhule ukuze kufike isikhathi sekwindla. Ikhula isiyaphezulu njengebizo layo ‘‘ulude’’.
Idliwa imanzi lanxa isingumfushwa. Lesi-ke yisitshebo esimnandi sesitshwala. Lawe uyazikhela lapha oyifice khona. Ensukwini zalamuhla usubona abantu beyithengisa emadolobheni umangale ngoba kwakuzila ukuthengisa ulude. Kuqakathekile ukuthi wazi ukuyipheka le imibhida abathi yilude.
Okudingakalayo
— Ilixha lolude elilingana imuli yakho
— Amanzi aqandayo
— Ingqamu
— Amatamatisi
— Ulaza kumbe amafutha (cooking oil)
— Isawudo
— Ibilebile loba i-pepper
— Imbiza
— Uphini
— Umganu
— Ipulanka
— Umlilo kumbe isitofu
Ukupheka
— Geza izandla
— Qoba ulude lube yiziqana
— Gezisa ulude ngamanzi aqandayo
— Phinda njalo ulugezise
— Khathesi lufake embizeni
— Lupheke okwemizuzu engamatshumi amane kumbe luze luvuthwe.
— Bona ukuthi amanzi asetshile.
— Khathesi qobelela amatamatisi
— Faka ulaza kumbe amafutha
— Faka isawudo lebilebile kumbe i-pepper
— Phenduphendula uyekele okwemizuzu emihlanu eziko
— Ungavuvuzela itshukela elincane ngokuthanda kwakho
— Dlana lesitshwala ukholise
— Maye! Lumnandi njalo luyasuthisa
NB: Ziphekele lawe.
Imbuya
Layo-ke imbuya imila emafusini iyisipho sikaNkulunkulu esedlula zonke izipho. Yona-ke ayithengiswa emadolobheni, izimilela yodwa nje. Ungayipheka kuhle uyazikholisela lawe.
Okudingakalayo
— Isixha sembuya esilingana imuli ezakudla
— Amanzi aqandayo
— Inditshi yokugezisela
— Ingqamu
— Amatamatisi
— Ulaza kumbe amafutha
— Isawudo, ibilebile, ipepper
— Leminye imithikazana oyithandayo (spices)
— Imbiza lophini
— Umganu lepulanka
— Umlilo kumbe isitofu
Ukupheka
— Gezisa imbuya iphele yonke inhlabathi
— Qoba imbuya
— Faka imbuya embizeni uyibeke eziko
— Yona ithatha imizuzu emine ukuvuthwa
— Faka ulaza kumbe amafutha lamatamatisi
— Faka isawudo le-pepper ngokuthanda kwakho
— Phendula ngophini
— Ungavuvuzela itshukela nxa uthanda
Ukudliwa
Dlana lesitshwala kumbe lesinkwa. Imnandi imbuya ayibabi ngitsho iyadandanje. ‘Dlana wena ukholise.
