uMthunywa
NANSI isitshebo sesintu esiqakathekileyo esasitsheba ngokhokho, kodwa lalamuhla silokhu sisaziwa njalo sitsheba.
Lesi sitshebo silula ukuthi uzenzele sona lawe. Okokuqala lima amazambane angavuthwa uwagebhe uwaqunte, angaze ome ubusuwacacada.
Okulandela lapha yikuwakhanzinga ubusuwakhupha izigogo ngokuwahlikihla. Khathesi sungalandela izindlela ezimbili zokwenza idobi kusiya ngokuthi uhlezi ngaphi kweZimbabwe. Inengi lamaNdebele liyawachola amazambane elitsheni lokucholela lenze inhlama. Kanti-ke abanye bawathela engigeni bawagige aze abe yimpuphu.
Yizo indlela zemvelo zokwenza idobi.
Phithiphithi ngokuguquka kwezizwe lamuhla sekulemitshina yokwenza idobi (peanut butter) lifakwe ezimbodleleni.
Nanti-ke lithengiswa ezitolo, lawe-ke ungazithengela uyetshebisa ngalo kumbe ulifake ezinkweni zakho udle ukholise.
Abantu abagulayo imikhuhlane eyehlukeneyo bayacetshiswa ukuthi badle idobi ngoba liqinisa imizimba ngokulwa lemikhuhlane leyo, likutshiye usuqine saka.
Nanzi-ke izitshebo zedobi ezehlukeneyo;
Idobi lemibhida yomfushwa
Imibhida yomfushwa yimibhida ephekwe yachaywa yonyiswa. Iyasiza kakhulu ngoba ebusika ingasekho, wena uzaba lokhu ulayo emgodleni wakho.
(1) Idobi lemibhida yolude loba eyendumba.
Okudingakalayo
— idobi ngokwalo elicholiweyo eligigiweyo kumbe (i-peanut butter) esembodleleni
— umfushwa wolude, indumba
— isawudo lebilebile loba i-pepper
— imbiza yokupheka
— inkomitsho
Ukupheka
— thatha idobi elilingana imuli yakho ngokhezo.
— lithele emanzini aqandayo ayingxenye yenkomitsho.
— goqoza ulihlanganise lize libe yibundubundu.
— khathesi bilisa amanye amanzi ngembiza abeyingxenye kumbe ulinganise ukuba ufuna idobi elinganani.
— thela idobi osulihlanganise lamanzi aqandayo emanzini abilayo ugoqoze.
— thatha imibhida osuyikhethile uyithele phezulu.
— goqoza uyekele kuxhwathe okwemizuzu elitshumi.
— faka isawudo lebilebile kumbe i-pepper.
— laphaya pheka isitshwala sakho usitshebe ngemibhida yedobi uzikholisele.
— imnandi uqobo
(2) Idobi lemihwabha
Imihwabha yinyama ebengiweyo yachaywa iluhlaza yaze yoma qha, ingaba ngeyenkomo imbuzi imvu inyamazana konke lokhu kusekuthandeni kwakho.
Okudingakalayo
— idobi elicholiweyo kumbe i-peanut butter esembodleleni
— imihwabha lamafutha okupheka ngokuthanda kwakho
— isawudo, ibilebile loba i-pepper
— imbiza lephini lenkomitsho
Ukupheka
— qala ngokuqoba imihwabha ibengamaqatha alingeneyo.
— faka imihwabha eqotshiweyo engigeni uyigigagige uyitshayatshaye ngembokodo loba ilitshe elihlanzekileyo.
— pheka imihwabha le okwehola elilodwa kumbe okwedlulayo.
— lokhu kuzakuya ngobulukhuni bayo.
— nxa isivuthiwe itshiye ilomhluzi olingana imuli yakho
— gwaqela idobi emanzini aqandayo enkomitsini, lize libe lubundubundu.
— lithele phezu kwemihwabha esivuthiwe.
— faka isawudo, ibilebile kumbe i-pepper lamafutha ngokuthanda kwakho.
— dlana lesitshwala, irayisi kumbe amagwili.
