uMthunywa
AMAJODO lawo aqeda ukutshisa ngesikhathi sokutshisa.
Wona-ke ungazilimela kumbe uwathenge emakethe ngokuthanda kwakho. Lapha ngikhuluma ngamajodo aphekwa asale elenkovu (umhluzi) wawo.
Kulula ukupheka la amajodo, lobani angaziphekela loba ehlala ngaphi emakhaya kumbe emadolobheni.
Lapha ngikhuluma ngamajodo aqeda ukutshisa ngesikhathi sokutshisa. Kufanele sidle okuqandayo ngesikhathi sokutshisa njengalokhu sisidla okutshisayo ngesikhathi zomqando.
Ngiyananzelela ukuthi abantu abanengi emadolobheni badla ama-pudding lama ice cream nxa kutshisa ukuze baqandelwe. Lamuhla ngizabethulela ukuphekwa kwamajodo ngamafitshane nje kulula sihlobo lawe zenzele lapho ohlezi khona.
OKUDINGAKALAYO
— Ijodo elilingana abemuli yakho
— Umganu omkhulu
— Imbiza/umphika ongatsheliyo (saucepan)
— umlilo kumbe isitofu
— Imganu omkhulu
— Itshukela ngentando yakho
— Amanzi aqandayo okugezisa ijodo
— Ijaki yokucengela umhluzi/inkovu yejodo
— Inkezo zokudla incezu zejodo
— lmiganu yokuphakulela amajodo emincinyane yeglasi (glass desert dishes)
— Ifiriji eqandayo yokubeka kuhlale kuqanda.
— Ilembu elihlambukileyo lokwesula ijodo nxa seligezisiwe
— I board yokusikela ijodo
— lzandla ezigeziweyo ezakho wena mpheki.
Ukupheka
— Gezisa ijodo ulesule lome elilingana imuli yakho
— Beka ijodo incezu ezingange sandla sakho ngazinye zinye
— Sika zize zilingane imbiza yakho
— Faka embizeni ezakuqala zikhangele phezulu.
— Izincezu zonke ezilandelayo zifake zikhangele phansi zize ziphele.
— Thela amanzi alingeneyo.
— Yekela kubile.
— Ngokubila yekela kuxhwathe emlilweni omncinyane/olingeneyo.
— Thontisela amaphutha ngokhezo lwetiye.
— Faka itshukela ngesilinganiso sakho.
— Khathesi yekela kuxhwathe kancinyane ubone ukuba akutshi.
— Bona njalo ukuthi umhluzi kawupheli.
— Yekela kuvuthwe.
— Zwana ukuthi ijodo selivuthiwe, nxa lingavuthwanga liyekele livuthwe lisale inkovu/umhluzi
— Bona njalo ukuthi iziqa azihlikizekanga
— Khupha imbiza eziko.
— Yekela kuphole
— Khathesi yekela ijodo ngalinye linye ubone ukuba alicubuzeki
— Thela umhluzi ejekini
Ngokunjalo yekela konke kuphole anduba udle uphinde unathe umhluzi wokuqeda ukutshisa, nxa kuthe kwasala kubeke efirijini.
Dlana uphole ukholise.
