uMthunywa
Nkosilathi Sibanda
IMIDLALO yenguqu eLupane, esabelweni seMatabeleland North isithole usekelo lwaphezulu oluhlose ukukhuthaza abadlali ukuthi benqabele ukusebenzisa izidakamizwa.
Usekelo lolu luvele kusomabhizimusi olothando lwenguqu kulindawo, uLetseletswe Nsimbi olembali yokuphakamisa ezemidlalo. Iligi le, ebizwa ngokuthi yiLupane Soccer League, isingene kuviki layo lesikhombisa. Kulamaqembu ayisitshiya galombili abalisa iLupane City, Lupane State University, Hotspurs, Elitsheni, Shining stars, Invaders, Super Eagles le-United Forces.
Ekhuluma lentatheli kaMthunywa ngoLwesibili, uNsimbi uthe umdlalo wenguqu ungenelisa ukuthi uvikele abadlali lamalunga omphakathi ezintweni eziphazamisa impilo.
“Siyakha isizwe ngokuphakamisa intsha yakithi. Sifuna abantwabethu abadlala ibhola bengasebenzisi izidakamizwa,” kutsho uNsimbi.
izidakamizwa
“Endaweni yokuthi abafana laba batshonele ukubhodabhoda bengenzi lutho, kungcono ukuthi bancediswe ekudlaleni kwabo inguqu leminye imidlalo. Ngokwenza njalo siyabaphakamisa,” nguNsimbi lo.
Uthe baphakathi kokuxoxisana labaqeqetshi bamaqembu eligi ephakemeyo, kuPSL ukuthi bavakatshele eLupane bazocupha ithalenta.
Unobhala weLupane Football Association uGeorge Mwambopo uthe ukunikeza abadlali ithuba lokuthi bazibonakalise kubaluleke kakhulu empilweni zabo.
“Isigaba seLupane sisasele muva kumdlalo wenguqu, ngakho sifuna ukuthi lathi sifinyelele phezulu. Umdlalo wenguqu uletha ukuthula, uphakamisa uzulu njalo,” kutsho uMwambopo lo.
Kubikwa amaqembu angaphansi kweligi le azadlalela lenkezo yeNsimbi Cup, Super Cup leChampions of Champions.
Abafundi bakhokha umoya phakathi kwezifundo zeCatch Them Young eLupane kuWard 15
Kusenjalo, iqembu leLupane City liyakhokhela kungalane ngemiklomelo engu-19, ngemva kwemidlalo eyisikhombisa. Abafana baleliqembu babambe zaqina phezulu nanko abakanqotshwa. Balandelwa yi-United Forces ngemiklomelo engu-12. Iqembu elihlala lihlupha, libanga inkezo ele-Invaders linamathele kunombolo yesithathu ngemiklomelo engu-11.
Abafana be-Lupane State University lokhe bedonsa nzima emsileni welogu ngemiklomelo emithathu kuphela.
