uMthunywa
Nkosilathi Sibanda
USOMABHIZIMUSI wakoBulawayo olothando lokusekela ezemidlalo ezikolo, uClemence Kunzekweguta usekhuthaze ababalisi besifazane kwezemidlalo, ukuthi bahlale belolwazi lobugcwethi, ukuze benelise ukulolonga abantwana kumidlalo etshiyeneyo.
Iseluleko sikaKunzekweguta, siza ngesikhathi kuqhutshwa imidlalo yokugijima engaphansi kwenhlanganiso zeNational Association of Primary School Heads (Naph) eMasvingo, laleyo eyeNational Association of Secondary School Heads (Nash), eFolosi kuliviki.
UKunzekweguta ongumqondisi omkhulu kunkampani yeZero Suppliers, ubatshazwa kakhulu ngokusekela imidlalo yokugijima ezikolo zemfundo yaphansi ezabelweni zakoBulawayo, eMatabeleland North laseMatabeleland South.
Uthe ababalisi besifazane akumelanga behluleke ukwengeza ulwazi lwabo lokuqeqetsha ezemidlalo.
“Ngiphosa iseluleko sami kubabalisi besifazane abaqeqetsha ezemidlalo. Ngithi kubo abakhuthalele izifundo zokuvuselela ulwazi lwabo njalo bengaziboni bengaphansi kwababalisi besilisa. Sonke siyalingana. Sekuyisikhathi sokuthi siphakamise ababalisi bethu besifazane, ikakhulu labo abalolonga abantwana kumdlalo wokugijima.
“Isizatho esenza ngikhathazeke kakhulu ngalokhu sivela ekuthi, balutshwane abesifazane abangabaqeqetshi kumbe abaphathi bezemidlalo.
Inkuthazo yami yikuthi izikolo zihlele amakhosi amatsha wokuvuselela ulwazi lwababalisi njalo ziqakathekise ukunxusa abaqeqetshi besifazane.”
UKunzekweguta, odume ngelithi “Mr Zero” uthe nxa izikolo zemaphandleni zifuna ukunqoba kwezemidlalo, kubalulekile ukuthi ziqine ngokudinga ababalisi abalothando kwezemidlalo.
“Umdlalo wokugijima ezikolo zamabanga aphansi ubalulekile ngoba yikho lapho okulolongwa kakutsha abantwana, lokuvumbululwa khona ithalenta elitsha. Ngakho ke, izikolo zemaphandleni, ikakhulu esabelweni seMatabeleland North, kumele zidonse ababalisi abalolwazi olujulileyo kwezemidlalo, Ngaphandle kwalokhu, abantwabethu ngeke benze kahle emncintiswaneni yaphezulu.
UKunzekweguta, ngaphansi kwenkampani yakhe iZero Suppliers usesekele ezemidlalo ezabelweni ezinengi kuleli.
Uthe kwelizayo, inkampani le izahlala isekela abantwana besikolo kwezemidlalo.
“Sikhona kukho konke okungadingwa yizikolo kodwa esifuna kwenzakale yikuphakanyiswa kwabesifazane ukuthi labo balingane njengabesilisa abaqeqetsha ezemidlalo. Singenza njalo, sizabe siphakamise isizwe lomphakathi esihlala kuwo.”
