uMthunywa
Nkosilathi Sibanda
ABADLALI bethenisi abedlula amatshumi ayisithupha kulimpelaviki bazaphatheka kumncintiswano weMakhandeni Tennis Club Invitational, enkundleni yeBulawayo Athletics Club (BAC).
Umqhudelwano lo, ungomunye wemiqhudelwano yokuqala emikhulu yethenisi koBulawayo uzaqhutshwa kusukela mhlaka 22 kusiya ku-24 Mbimbitho. Ekuqaleni, imidlalo yayihlelwe ukuthi ibekhona mhlaka 16 Nhlolanja, kodwa abaqoqi bayo bakhetha ukuthi bawudlulisele phambili ngoba befuna ukugcwalisisa okuthile.
Umqoqi omkhulu walumncintiswano uWitness Jiyane, ophinde abe ngumqondisi weMakhandeni Tennis Club uthe konke sekumi ngomumo njalo sebelungele ukuqala umncintiswano.
“Njengoba sabika ukuthi sesidlulisele umqhudelwano phambili, silokuthaba ukubika ukuthi uzakuba khona mhlaka 22 kusiya kumhlaka 24 eBulawayo Athletic Club.
“Lo ngumncintiswano wabasakhulayo abaleminyaka yokuzalwa ephakathi kwetshumi kusiya kwelitshumi lasitshiya galombili. Sikhangelele abadlali abedlula abangamatshumi ayisithupha. Inani labadlali lingedlula lapho ngoba kungenzeka kube labanye abazabhalisa ukudlala kumalanga alandelayo. Okwakhathesi siyasuthiseka ngamalungiselelo ethu,” kutsho uJiyane.
Uthe kumncintiswano walonyaka babambane lamankampani eSelect Health Care kunye leMiravana Transport. Wengeze ngokuthi banengi asebethembise ukuthi bazaphathisa kunhlelo zokuthuthukisa umdlalo wethenisi koBulawayo.
Abadlali abazancintisa, ngokutsho kukaJiyane bazaphiwa ithuba lokuthi bazitshengisele nanko bahlale isikhathi eside bengatholi imidlalo yaphezulu.
“Imidlalo yethenisi isizaqala ngomfutho khathesi. Sicela bonke abadlali abafuna ukuba yingxenye ye-Makhandeni Tennis Invitational basebenzise kuhle ithuba abaliphiweyo.
“Kuzakuba ngumcimbi wethenisi omkhulu sibili ngoba silabadlali abavela eGwanda laseMufakose leHighfields eHarare. Sikhangelele njalo labadlali abanengi abakoBulawayo abavela ezikolo ezibalisa iCharleston Trust, Northlea High, Emakhandeni Primary, Josiah Chinamano, Girls College leWhitestone Primary.”
UJiyane uthe ubonga abaxhasi babo, ikakhulu amankampani.
“Ngabe kwakungela sekelo besingeke senelise ukwenza lumsebenzi, sifike kubanga esesikulo. Sibonga i-Select Health leMiravana Transport.
Kumncintiswano wethu owaqhutshwa ngoMpalakazi nyakenye, sasekelwa yiPPC, Miravana Logistics leChicken Inn. Ngithanda ukubonga abaxhasi bethu bonke, kabaqhubeke besisekela.”
Umncintiswano weMakhandeni Tennis Club lo usuhwatshe ingcitshi zabadlali abasakhulayo asebenqobe enkundleni zaphezulu laphetsheya kwelizwe.
Kubadlali laba kuloKuzivaishe Chapepa lodadewabo uKudzai, Shain Tapera, Emmly Geerge, Akeelah Khanye, Zamani Moyo, Courage Ndlovu, Isaac Nyoni loMunashe Bera.
