uMthunywa
Silo Ophezulu Stinta
Kuliviki sikhangela indatshana elesihloko esithi sona Injinga YaseMandeni. Kule indatshana sihlangana lendoda igama layo nguMthunzi okucaca wayesesalelwe lusuku olulodwa kuphela ukuthi aphume ejele ngemva kokudonsa iminyaka elitshumi lambili.
Indoda le kucaca ikhona into engamphathanga kuhle lapha emoyeni wakhe. Ubotshwa nje watshiya egebhele inkalakatha yemali yakhe lapho okwakusazi yena khona, inkulungwane zamarandi angamatshumi amahlanu. Lwalumtshaya lumeqe lapho ezibuza ukuthi kambe wayezayithola na imali yakhe engako.
Wayebuya eziduduze ngelithi kakho ngitsho loyedwa owayezamphazamisa kule imali yakhe. UMarvinzah lo ababonke mhlazana betshontsha amapholisa amdubula wahle wahamba lobufakazi. Ngakolunye uhlangothi umnini sitolo okucaca nguye lo wayetshontshelwe lesi zimbungulu wayesawazi waziphumulela okutsho wayezaba yedwa kuleli qubaquba.
Wayeselawo amaqhinga okuthi imali le wayezathini ngayo. Wayeselawo umqondo wamatekisi osengusomabhizimisi uqobo wayeze agwabisele lezinye izibotshwa ejele lapha ukuthi yena ephuma nje eluthi bha! Phandle kwejele lapha uyabe yiNginga yase Mandeni uqobo okutsho ukuthi uyabe eyisinothi uqobo lwaso.
Lafika elingaliyo wakhumulwa umthunzi waqonda ekhaya lakhe elalise Mandeni. Indawo yayitshintshe okwamagama kambe iminyaka engaka! Laye wayesezibuza ukuthi pho emzini wakwabo kobe kunjani.
Bamhlangabeza abakwabo kanye lonina babheka ekhaya. Yena ke ingqondo yakhe yayivele ilenhloso enye qha ukuya fika kuleya ndawo eyaziwa nguye kuphela.
Wathi efika lapho wahlangabezwa ngumhlola ehluleka lokuthi angawubiza ngaliphi igama. Wafika wakhamisa wakhexa owangaphansi wangathi ufikelwa yisiyezi. Lapho kanye ayegebhele khona imali yakhe kwasekwakhiwe inkalakatha yesonto sekuyi mishini nje egqaqhele leloguma.
Pho imali yakhe wayesezayithola pho nxa sekunje waginqa waba manzi te, wazulelwa yimibuzo eminengi ekhanda lapha. Waze wacabanga ukuthi azibulale wabuye wawuziba lowu owokuzibulala wabona kungcono nje ayobhekana mathupha lomfundisi waleli sonto.
