uMthunywa
Ophezulu Stinta
Kundatshana elesihloko esithi Umgodi sitshiye uNgidi esethethe isinqumo sokuphindela ekhaya ayezihlalela lomdeni wakhe njengoba lendodana yakhe yayisiphendukile ngaphandle kwelizwe okwakusobala ukuthi impilo ayisoze iqhubeke ngokufanayo ephila impilo yobugqili.
Ukusa kwelanga elilandelayo kwaziwa nguye uNgidi. Wavuka wavalelisa omunye wakhe uZondi waphuma lemitshaqana yakhe engatsho lutho watshaya utshani. UPelepele lo yena kazange azihluphe ngokumvalelisa.
Waqonda esilindweni samabhasi, lapho-ke kazange alinde kakhulu, yathutsha ibhasi wahle weqela phakathi. Indlela yonke wayezibuza aziphendule efile ngenjabulo. Wazincweba waziphinda phinda ethi ngempela kungaba nguye owazala udokotela. Wagcina esefikile ekhaya lapho amukelwa khona ngenjabulo enkulu.
Wazibika uNgidi kumkakhe ngenjabulo ayephakathi kwayo, kwakumehlula ngitsho lokuthi nje adle ukudla okugobhozisa amathe ayekulungiselwe nguMaShezi. Bonke babengakukholwa ukuthi ngemva kweminyaka eminengi kangaka uSimanga wayelokhu ephila yena wayevele ehambele umzabalazo. Bona basebedelile kodwa incwadi abayamukelayo yabapha ithemba kanye lenduduzo ukuthi wayesaphilile. Umsebenzi owawuhanjelwe ngoSimanga ngaphandle kwelizwe wawubaluleke kakhulu, yibo ababeyelwela amalungelo abantu. Wayeselesiqiniseko uNgidi esokuthi loba sekutheni amalungelo abo babezawathola bazithole sebelingana layo yonke eminye imihlobo.
Basebemlindile kakhulu uSimanga lo elokhu engakafiki loba nje uMaShezi wagcizelela ngokuthi wayephathekile elungisa okuthile. UNgidi wayengasakwazi ngitsho lokuzibamba.
Balinda kwaze kwalalwa uSimanga elokhu engafikanga. Kuthe ngokusisa kwaqhamuka abesilisa ababili, laba kwakungabangane bakaSimanga. Bafika nje labo bazodinga ngelokuthi ngayizolo wayephuthe umhlangano okwakumele aze kuwo. Bona-ke babelethemba lokuthi mhlawumbe wayelibaziswe yikufika kukayise njengoba laye wayengasaphumi lasemlonyeni wakhe emlinde ngabomvu. Pho uSimanga wayengene kuwuphi umgodi engasabonakali nhlangothi zonke nje? uMaShezi wayesephatheke kubi kakhulu ngokungabonakali kukaSimanga.
Wayeselilahlile ithemba lokuphinda ayibone njalo ingane yakhe. Wayeseze ekhala ngokuthi yena wayesevele esedelile ukubuya ambone futhi kwasekuthunuke amanxeba. Wabasola kakhulu lalabo abayibo ababemthumela phambili ngezokulwela amalungelo. Abangane bakhe labo baduduza ngelithi njengomuntu omatasatasa ngemihlangano kukhona lapho ayebambeke khona.
