uMthunywa
Silo Ophezulu Stinta
SIKHANGELA indatshana elesihloko esithi Abakhongi. Isihloko lesi lapho sizama ukusizwisisa sichaza abahambela umkhwenyana kwabozala. Kusemzini wakoNgema lapho esithola khona intombi enguThobile ekhaya ijabulile okwamagama. Kubikwa nje ukuthi kwakulokhe nje kusileyo wayengazange ahlale phansi, wayelokhu engomileyo okukhomba ukuthi kukhulu ayekulungiselela ngalelolanga.
UThobile ulonina uMaNzuza lapha ekhaya okucaca nje laye engojabulileyo ngengoma ayelokhu eyicula ebalula ubuhle benkomo, okuveza nje ukuthi lapha kwakulindwe indaba yezinkomo. UMaNzuza inhliziyo ijabulile wehluleka khona ukuzifihla aze ayevezela ingane yakhe lokho okungaphakathi kwakhe. Uthi yena uzalilizela kudume isigaba sonke singaka. Injongo yakhe emqoka lapha yikukhawulisa umakhelwane uMashandu okucaca laye wayeke wamhlabekisa ngomkhwenyana wakhe ongumeli.
Kemanga ngoMashandu kodwa uze afake loMaBiyela yena ocala lakhe ngelokungamemi mhlazana elobolisa indodakazi yakhe. Kwasekulithuba lokuziphindiselela lapha kuMaNzuza. UThobile wayelokhu ezama ukuyinqanfa injabulo kanina. Laye waze wamvezela ukuthi wayelovalo thize ayelalo lapho ecabanga ngabakhongi labo ababelindelwe. Wayekhala ngelokuthi kudala-ke bedlala ngabantu besilisa okwasekusenza kube nzima ukubathemba laloba kukuphi. Lelo kalizange limjabulise uMaNzuza owazama ukuzwisisa ngokupheleleyo ngovalo lwengane yakhe.
UMaNzuza kazange athande ukulalela kumbe ajule ngokuvumela uvalo lwendodakazi yakhe le. Yena kuphela waqhubeka encoma abantu bakoBhengu ngelokuthembeka okuyinto eyayisimangalisa kanye lendodakazi yakhe ukuthi wayesesuthiseka ngabo okwanini. Indlela aziduduza ngayo uMaNzuza iveza sobala ukuthi ungumama odinga idlela njalo wayengathandabuzi ukuthi wayethole aluhlaza tshoko lapha koBhengu. AbakoBhengu yibo laba bakhongi ababelindelwe ngamehlo abomvu lapha ekhaya, amehlo wonke elokhu ejeqeza inkombalanga eyayisemdulwini.
Kusenjalo wangena uNgema onguye umnikazimuzi. UNgema wababaza ukulungiselela abakhwenyana okwakwenziwe ebuza nje ukuthi lokhe bathwetshulwa yingwe bakuzwa ngaphi lokho.
