uMthunywa
IMBONGI kule inkondlo ikhuluma ngomuntu emzonda kakhulu. Imzonda nje kulezizatho ezibethayo ezenza ukuthi imzonde kakhulu lumuntu. Wenza izinto ezimbi lumuntu yikho nje imbongi ikubeka sobala ukuthi ingeze yamthanda lumuntu. Ikubeka sobala imbongi ekuqaliseni ukuthi iyamzonda lumuntu. Isihloko senza angathi imbongi ikhuluma ngamuntu munye kanti hatshi ngoba umuntu emunye angeze enza ububi lobu obuqanjwe lapha.
Imbongi ithi umuntu lo imzonda ukwedlula imamba. Imamba siyayazi sonke ukuthi yinyoka eyingozi eyesabekayo, manje nxa imbongi isisithi imzonda ukwedlula imamba itshengisa inzondo enkulu elayo ngalo umuntu. Imbongi imzonda kakhulukazi kangaka nje kungoba wabulala uyise lumuntu. Iyaphambili imbongi ithi lumuntu ingeke imthande imzonda kakhulu ukwedlula impisi inyamazana eyaziwa ngobubi bayo obukhulu.
Iyabuza imbongi ukuthi ingamthanda ithini lumuntu yena efuna ukubulala unina. “Ngimthande ngithin’ umuntu lo yen’efun’ukubulal’umama?” Iyaqhubeka imbongi ithi lumuntu uzizondisa ngayo njalo ithi imzonda okwedlula umthakathi. Umthakathi ngumuntu ololunya, olomoya omubi okuthiwa uyaloya njalo uzondwa nguye wonke umuntu. Nxa imbongi ithi lumuntu imzonda ukwedlula umthakathi igcizelela ukuthi iyamzonda kakhulu lumuntu.
Iyabuza njalo imbongi ukuthi kambe ingamthanda njani lumuntu yena watshontsha inkomo zakwabo?
Iqhubekela phambili isitshela imbongi le ukuthi ingeze yamthanda lumuntu lanxa sekunjani. Itshengisa inzondo yayo enkulu kulumuntu ngokuthi imzonda okwedlula isikhova. Iyamzonda imbongi lumuntu ngokuthi imzonda ukwedlula inyoni okuthiwa isetshenziswa ngabathakathi — isikhova. Akulamuntu othanda isikhova ngoba kuthiwa sisetshenziswa ngabathakathi bona okuthiwa babulala abantu. Imbongi iqina ngombuzo wayo osujayelekile kunkondlo yayo othi ingamthanda njani lumuntu yena edlalela emathuneni abokhokho bayo.
Kusobala ukuthi lumuntu ozondwa yimbongi kahloniphi amasiko abanye abantu nanku usedlalela emathuneni abokhokho bayo, hlezi uyathakatha lumuntu, udingani emathuneni abanye abantu? Iyamzonda lumuntu imbongi kodwa ikubeka sobala ukuthi lumuntu uzizondisa ngayo ngoba imzonda, ezinye izinto ezimbi kakhulu ezisetshenziswa ngabathakathi yimikhoba. Sasizwe ukuthi abantu abaxhwalileyo, abangabathakathi batshayisa abantu ngezinto zabo — imikhoba.
Ngalokho-ke imikhoba yizinto ezizondwa kakhulu ngabantu okutshengisa inzondo enkulu yembongi kulumuntu ngoba umzonda okwedlula imikhoba ezondakala kakhulu. Njalo imbongi ingamthanda njani lumuntu yena efuna ukweqa uthango lwakhe athandane lomkayo ngoba nanku usemficela ilihlo. Ithi kathandeki lumuntu imbongi njalo imzonda ukwedlula ukufa. Mubi lumuntu ochazwa yimbongi ngoba nansi iyabuza njalo imbongi ukuthi ingamthanda njani lumuntu yena ehlala ethwele itshefu esikhwameni.
Uyingozi lumuntu ngokuhlala ethwele itshefu esikhwameni ngoba abanjalo kuthiwa bayafakela abanye ekudleni loba etshwaleni ukuze bengadla kumbe banathe bafe.
