uMthunywa
SIQHUBEKA ngenkondlo ethi, Umuntu lo! esiyiqale kuviki ephelileyo. Sizwile imbongi isitshela ngomuntu emzonda kakhulu njalo imfisela izinto ezimbi. Isitshelile imbongi ukuthi imzonda kakhulu umuntu lo ekhuluma ngaye ngoba wabulala uyise. Ngalokho imzonda ukwedlula imamba. Itshilo imbongi ukuba lo umuntu imzonda ukwedlula impisi. Ibuzile ukuthi ingamthanda ithini lowo muntu yena efuna ukubulala unina.
Iqhubekele phambili imbongi isitshela ukuthi umuntu lo uzizondisa ngayo okwedlula umthakathi ngoba lisela watshontsha inkomo zakwabo. Ichazile imbongi ukuthi ingeze yamthanda lumuntu ngoba uxhwalile udlalela emathuneni abokhokho bayo. Ngenye indlela lumuntu ngumkhunkuli kanti udingani emathuneni angasi akibo?
Uyaphambili umuntu lo ezizondisa ngembongi ngoba nanku wenza into embi kakhulu yokuficela umkakhe ilihlo. Lokhu kutsho ukuthi uyabe ezama ukumqomisa.
Siphethe imbongi ilokhu imzondele umuntu lo ithi imzonda ukwedlula ukufa. Isitshelile imbongi ukuthi ingeze yamthanda umuntu lo ngoba uhlala ethwele itshefu esikhwameni. Ngamanye amazwi kutsho ukuthi uyingozi umuntu lo uyafakela abantu itshefu kokunathwayo kumbe ekudleni. Lamuhla siyiqala inkondlo yethu imbongi ilokhu isidla amahabula ngenzo elayo kumuntu lo! Ithi imzonda okwedlula usathane, induna yezoni.
Isethulela umbuzo ukuthi imthande ithini umuntu lo yena eyinswelaboya yesigaba. Lokhu kutsho ukuthi umuntu lo yisigangi ugebenga abantu esigabeni. Abantu besigaba bahlalele evalweni besesaba yena. Okunye okuvezwa yimbongi yikuthi umuntu lo laye uvele uyayizonda imbongi. Uyizonda ngokukhulu imbongi ngoba imbongi ithi umuntu lo uyizonda okwedlula konke okuphilayo. Yinzondo enkulu okwamagama leyo nxa uzondwa okwedlula zonke izinto eziphilayo.
Imbongi layo iyabuza ukuthi imthande ithini umuntu lo yena evele eyizonda kanje. Ngalokho-ke imbongi itshengisa inzondo enkulu kulumuntu ize imfisele okubi. Imbongi ifisa ukumfica umuntu lo esilwa lemamba, inyoka leyana esiyichaze ngokuthi ilolaka olukhulu ngeviki ephelileyo. Ithi nxa imfica enjalo iyancedisana lemamba ekumbulaleni. “Ngifis’ ukumfic’ esilwa lemamba, Ngincedisane lay’ekumsuselen’amanqe. Ngiphele ngilwisane lemamba ekucineni.”
Imbongi layo iyamzonda kakhulu umuntu lo ngoba ifisa ukuncedisana lenyoka evele iyingozi ukuthi babulale lumuntu yona ibisilwisana lesitha sabantu lesi esiyimamba lomuntu evele esefile. Imbongi iyazigeza kulinzondo elayo kulumuntu ngokuthi ingamnceda njani umuntu lo yena evele ezondwa ngabakwabo. Kusobala ukuthi umuntu lo kalunganga ngoba nanku uzondwa langabakibo. Lokhu kuphambana lesaga esithi akusilima sindlebende kwaso. Lokhu kutsho ukuthi umuntu lanxa emubi kanjani ezenzweni abakwabo abazebamlahla lanxa enjalo. Kodwa umuntu lo! Labakwabo bayamzonda.
