uMthunywa
Silo Charles Dube
Inkondlo yethu lamhlanje imayelana lelanga lona leli elisikhanyiselayo. Linye ilanga okwenza imbongi ilenze samuntu oyindoda ongathathanga umfazi, obizwa kuthiwa yinsumbelume. Lude uhambo olwenziwa lilanga njalo kade laluhamba loluhamba ilanga ngoba imbongi ithi yinsumbelume yaphakade.
Ilanga beluluhamba loluhambo kusukela kudala. Empondozankomo ilanga lihle liphume empumalanga imbongi ekubiza ngokuthi yikuphunyuka impumalanga ngoba liphuma liyitshiye impumalanga lihlose ukuyaqomisa inyanga ukuze lihlale kunye layo. Kodwa isimanga yikuthi kaliyitholi inyanga leyo, licina lisanga intshonalanga.
Imbongi iyalibuza ilanga ukuthi singaphi isiphaqa salo? Isiphaqa sitholakala ebusweni abanye bethi kusebunzini, ngenye indlela isiphaqa silokwenza lokuqonywa ngoba eselanga kasibonakali yikho nje lenyanga ingaliboni.
Selihambe lahamba umango wonke lo ilanga lidinga ukuqonywa yinyanga kodwa kukhanya isithukuthuku salo siphelele emoyeni. Kalibuyelwa yilutho ilanga leli ekuhambeni kwalo okwenza imbongi ithi lokhu kubangelwa ngumnyama ngoba iyalibuza ilanga ithi, “Ngumnyama bani lowo owakho?” Iyalixwayisa njalo imbongi ilanga ngesaga esithi, “akuzinuk’amakhwapha uzazise, lelizwe lonk’ulazise,”. Ngamanye amazwi imbongi itshela ilanga ukuthi kalizihlole, lizizwisise libone ukuthi lokho okwalo kubangelwa yini.
Nxa selizihlolisisile ilanga lakwazi ukuthi okwalo kubangelwa yini kumele lazise abantu bonke bomhlaba ukuze usizi lolu eliphakathi kwalo ilanga abantu bonke baluzwisise. Imbongi ikhumbuza ilanga ukuthi yalikhanda ligeza umnyama emfuleni okweleMfilabuso obizwa ngokuthi nguNkankezi. Lapha imbongi ingabe yabona isithunzi selanga emfuleni lowo ilanga selisiyatshona yakuthatha ukuthi laligeza umnyama. Yinkolelo yesiNtu leyo eyokuthi nxa umuntu elomnyama kuthiwe ayewugeza emfuleni othile.
Into eyisimanga kumbongi yikuthi lanxa wabona ilanga lisenzenjalo kodwa umnyama omkhulu abathi ngumnyama ka-banana ulokhu ulihlezi ilanga. Lilokhu lilawo umnyama ngoba ubunsumbelume buyaphambili.
Kaligezanga kuNkankezi yedwa ilanga ngoba imbongi ithi yalifica lisenzenjalo lakumfula uMtshabezi.
Lisenzenjalo lahlekwa zinkanyezi ngalokho ezazikubona. Singakhohlwa ukuthi nxa sezichazwe kanje inkanyezi sezenziwe samuntu ngoba nguye owenelisa ukuhleka.
Amaxoxo lawo enziwe samuntu kuthi aklabalala elihoza ilanga. Isithunzi salo ilanga satshabalala ngokufanayo lenziwe samuntu kuthiwa labanjwa zinhloni ilanga lanyamalala okuveza ukuthi ngesikhathi lihlekwa zinkanyezi lamaxoxo laselibanga ukutshona ngakho lahle latshona. Sokusobala ukuthi lembongi iyakholwa kuBhayibhili elingcwele ingenisa indaba kaAdamu loEva bakudala. UNkulunkulu esebona ukuthi uAdamu ulesizungu wamenzela uEva ukuba abengumkakhe.
Ngendlela efanayo imbongi ithi ilanga lona kwathiwa lilandele inyanga ngemuva kanti ngokwenze njalo selihlatshwe ngameva abuhlungu.
