uMthunywa
Ophezulu Stinta
SIQHUBEKA ngendatshana zethu ezimfitshane ezithinta okunengi empilweni, indaba ezibuhlungu ezihlekisayo kanye lempumela yempi yomzabalazo kwelase Mzansi Africa.
Sikhangela indatshana elesihloko esithi Ikhehla. Kundatshana le sihlangana lomlingiswa okuthiwa nguBazibile.
Ujaha lo ukhanya ezonde egane unwabu esidla amalahle, ubhala incwadi ebhalela umfowabo uMthembeni.
Isiqokoqela sendaba esiyiso esimenza ahlale phansi athathe usiba lephepha yikuthi wayeyamukele incwadi eyayivela kunina. Unina wayemazisa ngokuthi wayesethethe umhlalaphansi, esetshiya umsebenzi esezoziphumulela, sasingekho-ke isidingo sokuthi asebenze njengoba ingane yakhe zasezikhulile sezisebenza.
Kuncwadi kaBazibile kwakulamagama athi ‘‘. . . into engibona ukuthi ingase isixabanise yikuthi kunekhehlana lami esengizitholele lona ngapha eThekwini. Manje ke mntanami bengicabanga ukubuya nalo, ngizohlala nalo ngapha ekhaya . . .” Ngamazwi amethusa kakhulu uBabazile la lapho ewathola encwadini eyayibhalwe ngunina. Kwahle kwamcacela ukuthi unina wayesethole ixhegu le eThekwini ayesezimisele ukuzohlala lalo lapha ekhaya. Umcabango kaBazibile wahle wasabalala ngelithi phezu kwamandla angaka besakha indlu ngelokuthi bonwabe beyimuli unina wayesekhethe ukuletha umuntu wokuza, ozangena nje konke sekulungile. Indlu yayifakwe lamandla kagesi okutsho ukuthi lelixhegu lalizakhudumala kanjalo nje. Uthini ngocingo olwalusanda kufakwa selihlezi esofeni litshayela izihlobo zalo? Yayicunuka ngamandla inhliziyo yakhe.
Wazama lokubonisa udadewabo uPhindile ngendaba le. Yena-ke wala ngelithi mhlawumbe unina wayesevumbulule uyise. Okwenza yanenka ngamandla inhliziyo yakhe yikuthi kwangena umngane wabo uNomakhosi. Yena-ke wayekhala ngesifanayo, emva kokutshona kukayise unina wahle wahudulela ikhehla ekhaya. Kuyacaca-ke ukuthi ikhehlandini leli laingazibekanga njalo lingahloniphi. Ngalelolanga lisele loNomakhosi lacela ukuthi alenzele itiye,
lapho esemupha itiye nanto seliqala ukumphulula sengathi yintombi yalo. Kulapho-ke aphuma khona ngelokuphephela koPhindile.
Ngobunye bobubi obuhlanga lezingane ezizithola zihlala laboyise abangazizaliyo, amaxhegu la adojwa ezitaladeni angaboni izingane ngelihlo lezingane. Pho uBabazile wayengavuma ngaliphi ukulethelwa inyoka ekhaya belabodadewabo ababengehlelwa yingozi efanayo? Isehlakalo esinye silimukisa abesifazana ukuthi bananzelele ingozi abayilethela abantwana ekhaya, njalo kuqakathekile ukuthi babone lihlo linye labantwana kuzinqumo ezifana lalezi.
