uMthunywa
UMQEQETSHI weMamelodi Sundowns, uPitso “Jingles” Mosimane, useveze ukuthi akasoze waba nguqhwayilahle lanxa leliqembu lingamxotsha.
Ngempelaviki, ngemva kokuthi iSundowns ikhitshwe kuCaf Champions League, uMosimane uveze ukuthi usekwenze konke okudinga yena futhi sekuphele umnyaka wasayina isivumelwano lezikhulu zeqembu.
Umsebenzi womqeqetshi lo uphela ngoNhlangula.
Enkulumeni ekhethekile kumsakazo we-SAFM, ngoMvulo, uMosimane udalule ukuthi kulamaqembu amfunayo enhla ye-Africa futhi angaya khona nxa engacina ekhonjwa indlela yiSundowns.
“Kulezinto ezimbili. Ngingagxila ebholeni lezikolo engifuna ukungena kuzo, ngingahlaba ikhefu ngibone ukuthi ngizokwenzani. Mhlawumbe ngiye enhla ye-Africa ngoba igama lami selilikhulu kuzwekazi.
“Angisoze ngasokola ukuthola iqembu. Angisoze. Ngitsho amaqembu akuma-semi-final (Champions League) ayakhuluma. Ngiyakhuluma lawo. Angenqabi ukusayina kwelinye iqembu ngoba ngihola kakhulu (kuSundowns). Ngiyayithanda iSundowns,” kutsho uMosimane.
Eminyakeni eyisikhombisa uMosimane eqeqetsha iSundowns, uwine izicoco eziyisitshiya galolunye. Kulezi inkezo kukhona eyeChampions League (2016) leyeligi aseyiwine amahlandla amane. Uthe ulethemba lokuthi imisebenzi yiyona ezomenzela kuhle.
“I-Sundowns ilelungelo lokungasivuseleli isivumelwano. Inkontileka ilosuku lokuyiqala losuku lokuyiqeda. Kufanele sikuhloniphe lokho. Akuyi ngokuthi wenzeni loba yini ongayenzanga.
“Kungenzeka ukuthi balezifiso ezinkulu, kungenzeka balomuntu ongcono. I-Sundowns iliqembu elikhulu, isiye kathathu kuBarcelona ilanda abaqeqetshi. I-Sundowns ingamthola umqeqetshi ongaphezulu kwami. Asingazikhohlisi,” kutsho uMosimane.
“Ibhola liyibhizinisi. Wonke umuntu kufanele alinakekele ibhizimusi lakhe. Umkhokheli weMamelodi Sundowns (uPatrice Motsepe) nguye olombono ngeqembu. Ngiyethemba ukuthi uzobona ukuthi ngifanele ukuhlala lapha. Ngiyakholelwa kulokho. Angilaso isizatho esingangenza ngithi ngeke kwenzeke lokho. Kodwa nxa engafuni ngihlale kufanele ngiqhubekele phambili.”
UMosimane uveze ukuthi okumqinisa idolo ukuthi uzohlala kuSundowns, yikuthi abaphathi balwemukele uluhlu lwabadlali abafunayo.
“Kufanele ngilethe abadlali engicabanga ukuthi ngizosebenza labo. Kufanele ngihlalele ethembeni. Okungikhuthazayo kuyo yonke lento yikuthi bebengeke bavume ukuthenga abadlali ababuye lami.
“Angicabangi ukuthi umongameli weqembu engenza okuhlukileyo. Kungaba yisimanga. Ngingamsayinisela kanjani omunye umqeqetshi abadlali?” kutsho uMosimane. — Ubulembu
