uMthunywa
Siphathokuhle Ngulube
Salibonani bafundi. Ngithemba liqhuba kuhle ezifundweni zenu lanxa nje kulikhefu. Phela ikhefu bafundi alitsho ukuthi abantu bafulathele izingwalo babengumhlambi kazelusile. Lanxa zivaliwe izingwalo azikhalalwa ngoba phela umuntu uyathi ebuyela esikolo sekumnyama tshu engasazi lutho bahleke ontanga baqamelane.
Kuyadanisa ukuthi inengi lenu bafundi ngekhefu lisuka ligijimise izinto ezingelancedo ngitsho. Okunye kwalokhu yile imihlangano elibalayo ezindaweni ezithile okungakhangelelwanga ukuthi libe kuzo ngesikhathi esithile ikakhulu kulabo abasemadolobheni. Ufice selenze iziqumbi kuxoxwa izindaba ezingapheliyo. Umbuzo omkhulu kubazali kanye labantu nje jikelele ngothi, “Ngeyani imihlangano le?”,
“Kuxoxwani kanti okungapheliyo?”.
Ngemva kokuchwayisisa okukhulu, kuvelile ukuthi kule imihlangano yikho lapho okuphekwa khona izinto eziyindinabadli ezingathandwa nguzulu. Kuvelile ukuthi yikho phela bafundi eliqoqa khona imicimbi le esisanganise abazali lozulu wonke ethiwa ngamaVuzu. Imidlalo yenu le bafundi abazali abayithandi ngoba izinto elizenza kuyo zingcolile njalo ziyenyanyeka. Umbuzo omkhulu njalo uthi,
“Imali yokuqoqa le imidlalo liyithatha ngaphi nanku phela lingolova, obhuqukudla nje.
Kuvelile futhi bafundi ukuthi kuyonale imihlangano yikho lapho elinikana khona izidakamizwa ezenza abanye benu bacine bengasaziphathi ngendlela. Ufice umuntu esekhulumela phezulu engasakhethi mabala kanti futhi engasakhethi ukuthi ungaphi, kulobani? Imfundiso leyana eliyifundisiweyo ethi ulimi lulendawo njalo luyangokuthi ukhuluma lobani liyabe seliyilibele.
Abanye benu ufica begcike izindlebe ngokuzintanjana okuvela kubomakhalekhukhwini ubone nje ukuthi sebekowabo umhlaba bodwa. Izimota zitshaye amawuta zihawule umuntu engezwa lutho.
Ngokunjalo-ke bafundi kuyavela ukuthi imihlangano le ayilunganga. Yenza inengi lenu bafundi liphume endleleni lenze izinto ezingakhangelelwanga ngabazali kanye lomphakathi. Iqiniso elikhona yikuthi abazali kanye loHulumende abayithandi imihlangano le ngoba kumgceke ukuthi impumela yokuhlangana kwenu ayinhle.
UHulumende uyazama ukuhanqa lokuchitha imihlangano le kodwa kusobala ukuthi liphenduka libe ngamagundwane amapholisa abe ngomangoye kudlalwe umacatshelana kube luthuli. Ulimi oluyabe luphuma lapho luyabe lungcolile lunuka phu. Omunye wenu wezwakala esithi, “Amapholisa la awatshiyane lathi bayebopha izigangi esezihluphile hatshi thina.” Kwacaca-ke ukuthi umfundi lo uzibona esenza into enhle ngokutshona emile emakhulusini edolobheni. Ngalokho-ke bafundi kuyavela ukuthi imihlangano yenu yedolobheni ayithandeki, ake lizinuke amakhwapha lihlukane layo ngoba inengi lenu ikusasa labo lichithwe yiyo yonale imihlangano, ubuntu labo batshabalala nje.
Ake uzibuze ukuthi yikuphi okuhle okuthole kule imihlangano? Impendulo oyitholayo iyakuthokozisa yini? Zidle ngaphakathi ntombi, jaha. Asibonaneni ngeviki ezayo.
