uMthunywa
Lovemore Dube
AKWAZIWA ukuthi iyozala nkomoni ngempelaviki kumaqembu akhangelane lokuxotshwa kuligi yeCastle Lager.
Kulamaqembu amane azabhekana lezembe nanko iligi le isibanga emaphethelweni. Kuzabe sekudlalwe imidlalo engamatshumi amathathu lane.
Akuvamanga ukuthi kube lamaqembu amane asemsileni wengalane, alwisa ukubalekela ukukhitshwa emncintiswaneni.
Kumaqembu la kuleSheasham, ehlezi kunombolo yetshumi lesikhombisa, Black Rhinos (16), Triangle (15), Yadah (14) leZPC Kariba (13).
Lilodwa kuphela iqembu kwamane la elizasinda, ikanti amanye amathathu azalandela iCranborne Bullets evele isixotshiwe.
Ukulwa kwamaqembu angaphansi kwengalane kuza ngesikhathi sekusaziwa ukuthi iqembu leNgezi Platinum yintshantshu yenguqu yeCastle Lager ngemiklomelo eyi-66, phezulu kweqembu leDynamos leManica Diamonds.
Kulezo ezifuna ukubalekela izembe, iZPC Kariba ilemiklomelo engu-38. Bazavala isizini bedlala leCranborne. Kodwa iKariba ilenkinga yokuthi ingekethisa ukudlala kakuhle, kungenzeka ithathelwe indawo yiYadah Stars yona ephethe imiklomelo engu-37.
Nxa iYadah inganqoba, kungahle kuphele okweZPC Kariba.
Amaqembu abalisa iTriangle, Black Rhinos leSheasham zimi mpo ngemiklomelo eyi-35 njalo wonke engaqeda ephethe imiklomelo engu-38 ngokunqoba ngempelaviki.
Iqembu leYadah lidibana leDynamos. Akusoke kubengumdlalo omncane lo ngoba leDynamos ikhangelele ukuthi iphethe umnyaka yenze kuhle. Ihlose ukuqeda ikunombolo yesibili.
IDeMbare izaqina ngokusebenzisa uTanaka Shandirwa loJunior Makunike ukuze badonse phakathi kwenkundla.
Imidlalo:
NgoMgqibelo: Cranborne Bullets v ZPC Kariba (Mandava), Yadah FC v Dynamos (National Sports Stadium), Simba Bhora v Black Rhinos (Baobab), Sheasham v FC Platinum (Bata), Greenfuel v Triangle (Greenfuel Stadium), Bulawayo Chiefs v Manica Diamonds (Luveve)
NgeSonto: Highlanders v Ngezi Platinum (Barbourfields), Caps United v Herentals College (National Sports Stadium), Hwange v Chicken Inn (Colliery)
