uMthunywa
Arnold Ndlovu
IQEMBU lelizwe leZimbabwe elekhilikithi selihle lidonsa nzima emidlalweni yalo leqembu leSouth Africa ngemva komdlalo wokuqala.
Ukungadlali kuhle kweqembu lesizwe kubonakale emdlalweni wabo wakuqala phakathi kwemidlalo emine ezadlalwa phakathi kwamazwe womabili endaweni eSt George’s Park esabelweni sePort Elizabeth eNingizimu Africa.
Kumdlalo lo, iqembu leSouth Africa amaProteas lidlale kuhle kakhulu lathola 309 runs sokuphume abadlali abayisitshiyagalolunye (309-9). Ngokusuthiseka ngokudlala kwabo bakhethe ukumisa umdlalo (declare) banika iqembu leZimbabwe ithuba lokuthi lidlale betshaya ibhola.
Ukungena kweqembu leZimbabwe enkundleni bezotshaya ibhola kuveze ukungadlali kuhle kwabo ngoba abadlali bephume belandelana masinyane kodwa ama-runs elokhe ephansi.
Umdlali weSouth Africa ojikayo uMorne Morkel uveze ukuxega kweqembu leZimbabwe ngemva kokukhipha abadlali abathathu ngesikhatshana nje. Kuthe ngesikhathi umdlalo umiswa iZimbabwe ibisile 30runs kuphela kodwa sokuphume abadlali abane.
Abacine bebambile enkundleni ngesikhathi kumiswa umdlalo lo nguRyan Burl obele 15 runs kanye lo Kyle Jarvis obele 4runs.
Loba nje bekhitshwe ngesiphangiphangi abajiki beqembu leZimbabwe bake banceda iqembu. Iqembu leZimbabwe like lazama ukutshengisa ikhono labo ngoba besajika benelise ukukhipha abadlali abahlanu bokucina belizwe leSouth Africa betshaye bagijima 37runs kuphela.
Abadlale ngcono kuqembu leZimbabwe nguJarvis owenelise ukukhipha abadlali abathathu kodwa wabangela ukuthi iqembu le South Africa lithole 78 runs lo Christopher Mpofu okhiphe abadlali abathathu kodwa wadala ukuthi iSouth Africa ithole 58 runs ezivelela kuye.
UChris Mpofu wenelise ukukhipha abadlali abatshaya kakhulu eqenjini leSouth Africa abagoqela uHashim Amla lo De Villiers, kodwa ukudlala kuhle kuka Aiden Markham owenelise ukuthola 125 runs obekuyikuthola kwakhe kwesibili ukugijima ukudlula 100 runs emidlalweni yakhe.
Abalandeli beqembu leZimbabwe bathole ithuba lokuthi babone umdlali wabo omutsha okukhangelelwa ukuba lekusasa elihle emidlalweni yekhilikithi uBlessing Muzarabani.
