uMthunywa
KULINDWE umhlaka 3 Zibandlela ngomnyaka ozayo ukuthi kwaziwe ukuba amaWarriors azaqhubekela phambili esiya kumqhudelwano weAfcon.
Aphazamisekile amalungiselelo eqembu lesizwe nanko iFIFA isibike ukuba kungaba lezijeziso nxa iSports and Recreation Commission (SRC) ingaphikelela ngenyathelo layo lokubhidliza iZifa.
Kudonselwana intambo phakathi kweSRC lenkokheli zeZifa ezibalisa ibhodi lamakhansila ayo.
Ibhodi yeZifa ekhokhelwa nguFelton Kamambo, yamiswa umsebenzi mhlaka 16 Lwezi, isetheswa amacala okungenzi kuhle umsebenzi njengalokhu okukhangelelwe.
Sekunjalo, iZifa yaxhumana leFIFA icebela ngalokhu, ngoba ikholelwa ukuba kuzadala ukuthi inguqu imiswe kuleli.
Kwenzakele kuliviki iFIFA ilobe incwadi isazisa ukuba akulalutho olubi olwenziwe yiZifa. Inhlanganiso yeFIFA ithe yenze umhlangano leZifa leSRC, kodwa umgcisihlalo weSRC uGerald Mlotshwa ubengekho.
Kuncwadi ebonwe liphephandaba likazulu, kuvezwe ukuba iSRC kumele yesule iqula elakhethwa ukuthi libambe intambo zeZifa.
Iqula leli, elethulwa nguMlotshwa kunsuku ezinhlanu ezedluleyo, libalisela umgcinisihlalo walo uBlessing Rugara, Tommy Sithole, Desmund Ali, Joel Gombera, Anna Mguni, Joyce Kapota, Rudo Mugandani, Brian Busani Moyo loCharles Sibanda.
