uMthunywa
Nkosilathi Sibanda
NGEKHEFU lePhasika kuledili elikhulu lomdlalo webhola lenyawo kuligi yeCastle Lager, nanko kulemidlalo eminengi kusukela lamuhla kusiyafika ngoMvulo.
Imidlalo le bekumele idlalwe ngeviki edluleyo kodwa yamiswa ngoba kulekhefu leFifa, elenze leqembu lamaWarriors layancintisa ku-Four Nations Tournament eMalawi.
Ukwedluliselwa phambili kwemidlalo kujabulise abaqeqetshi labadlali ababike ukuba kubanikeze ithuba lokuthi balungisise amaphutha ngemva kwemidlalo emibili isizini iqalile.
Isikhulumi senhlanganiso yePremier Soccer League, uKudzai Bare utshele intatheli yephephandaba likazulu ngoLwesibili ukuthi ngendlela okuhlelwe ngayo imidlalo, bahlose ukuthi abalandeli labathandi bomdlalo bazilibazise ngenguqu ngesikhathi sekhefu.
“Imidlalo yesithathu kuligi yethu iqalisa ngoLwesine. Bazakholisa abalandeli bomdlalo njalo njengenjwayelo, sicela ukuba bangene enkundleni ngobunengi babo.”
Kumidlalo le, ngoLwesine, abafana abachinsa inkundla zePSL i-Arenel Movers, banxuse iqembu leHerentals eLuveve.
Umqeqetshi we-Arenel Movers, uFarai Tawachera wakutsho ngaphambilini ukuba umdlalo wabo wesithathu kuzamele bawunqobe loba sekutheni.
I-Arenel Movers isibengutshiki lobhanqa kumidlalo yayo leChicken Inn leDynamos. UTawachera wabika ukuba ufuna ukuthi abambe wonke amaqembu azadlala lawo kumidlalo emihlanu yakuqala.
Iqembu likaJoseph Antipas, iChicken Inn lingene umango liqonde edolobheni leZvishavane ukuyadibana leFC Platinum.
Ekhuluma lentatheli, umqeqetshi weChicken Inn uthe uyajabula ukuthi ikhefu libanikeze isikhathi esengeziweyo sokuhlolisisa iqembu labo.
“Eqinisweni, besikulungele ukudlala ngempelaviki edluleyo. Kodwa ngicabanga ukuthi kuyisibusiso ngoba senelise ukuthi siqondise abafana, silethemba lokuthi sisenza kuhle,” kutsho u-Antipas.
ICaps United le Bikita Minerals enkundleni yeRufaro. Umdlalo lo uzadonsa amehlo ngoba yiwo ozavula inkundla yeRufaro ebivaliwe okwesikhathi eside.
NgoLwesihlanu, kukhangelelwe ukuthi kugcwale phamu enkundleni yeBarbourfields lapho iHighlanders ezakwamukela iSimba Bhora.
Akwaziwa ukuthi kuyozala nkomoni kulumdlalo nanko iSimba Bhora isivele yafunga ukuthi kayilandanga ukuzodlala koBulawayo. Iqembu leli lilemali njalo abadlali balo bayazi ukuthi benganqoba iBosso okuzwayo, bazabuyela kubo isikhwama zigcwele.
IHwange isekhaya layo, eColliery leBulawayo Chiefs ngelanga elifanayo.
Kusenjalo, abacubunguli bomdlalo sebetshayele abalandeli beHighlanders izandla, bebabaza indlela abagcwalisa ngayo iBarbourfields.
Kuyo yonke imidlalo, lapho okudlala khona iHighlanders iyagcwala phamu. Iqembu leli ngoMvulo lizabe liseGweru lidlala leTelOne enkundleni yeBata.
Imidlalo ngokugcweleyo:
NgoLwesine, 28 Mbimbitho
CAPS United v Bikita Minerals (Rufaro), Arenel Movers v Herentals (Luveve), FC Platinum v Chicken Inn (Mandava), ZPC Kariba v Ngezi, Platinum Stars (Nyamhunga), Greenfuel v TelOne (Greenfuel Arena), Manica Diamonds v Chegutu Pirates (Sakubva)
NgoLwesihlanu,29 Mbimbitho
Highlanders v Simba Bhora (Barbourfields), Hwange v Bulawayo Chiefs (Colliery Stadium), Yadah Stars v Dynamos (Rufaro)
NgeSonto
Chegutu Pirates v Greenfuel (Baobab), Chicken Inn v ZPC Kariba (Luveve), Herentals v FC Platinum (Nyamhunga), CAPS United v Arenel Movers (Rufaro)
NgoMvulo
Simba Bhora v Hwange (Wadzanai), TelOne v Highlanders (Bata), Ngezi Platinum Stars v Manica Diamonds (Baobab), Bulawayo Chiefs v Yadah Stars (Luveve), Bikita Minerals v Dynamos (Sakubva)
