uMthunywa
YiNtatheli kaMthunywa
IZIKOLO ezidlala inguqu kuleli sezilolonga abadlali bazo zimelele ukuqala komqhudelwano omkhulu owenkezo yeCOPA Coca-Cola osungulwe ngeviki eledluleyo.
Inkezo le ifikisa iminyaka engamatshumi amathathu lanye lonyaka njalo yiyo eqakatheke ukwedlula zonke kukhalenda yezemidlalo ezikolo.
NgoLwesithathu ngeviki edluleyo kusungulwe umncintiswano ka-2019 esikolo sePamushana esabelweni seMasvingo lapho okugcizelelwe ukuthi izikolo kumele ziqhubekele phambili zilolonga ithalenta labasakhulayo.
Kulumbuthano, uArthur Maphosa umongameli wenhlanganiso yabaphathi bezikolo eyeNational Association of Secondary Heads (Nash) ubeke isicelo sokuthi lonyaka izikolo kumele zitshiyane lomkhuba wokuqila.
Isicelo sakhe siza ngemva kokuba kumemetheke imbiko yokuqila okwenziwa ngezinye izikolo. Kubikwa bakhona ababalisi labaphathi abalokhu bedlalisa abantwana abaleminyaka yokuzalwa ephezulu kwe-15.
Umthetho we-COPA Coca- Cola uvumela ukuthi kuncintise abantwana abaleminyaka yokuzwalwa engaphansi kwe-15.
UMaphosa uthe ekhuluma ngokuqeda “idlozi” lokuqila, utshayelwe ihlombe ngoba kade kwakhulunywa ngodaba lolu kodwa kungela olesibindi sokuluhlafuna ebandla.
“Phansi ngobuqili. Idimoni lokuqila aliphele kumidlalo yezikolo. Nxa kuzamele sisebenze, asitshiyeni umkhuba lo osulimaze isisindo senguqu yethu ezikolo. Ukuqila kulimaza ithalenta labantwabethu. Kulumncintiswano weCOPA Coca-Cola sicela ukuthi sisebenzele ukuqeda lumkhuba. Ngithi phansi ngokuqila,” kutsho uMaphosa.
Uqhubeke phambili wathi inhlanganiso yabo isithwele nzima ngokuthonisa amacala ababalisi abephula imithetho.
“Njengababalisi kumele sitshiyane lemikhuba enje ngoba ibisela impumelelo emuva. Izikolo zibhejela ukulahlekelwa yimali zithenga olova, endaweni yokuthi imali le isetshenziswe kubadlali abafaneleyo. Kumincintiswano yalithemu uyezwa abantwana besinye isikolo bekhala ngokuthi umdlali okuqembu lesikolo esithile kade waqeda ukufunda.
“Isikolo sinye ngasinye siyisiqalo sokubonakala kweziphiwo zabantwana kwezemidlalo, ngakho ukuqila ngeminyaka yabantwana yikuqila ikusasa yabo,” kutsho uMaphosa ongumphathisikolo eGwanda High. Zikhona izikolo ezaziwa ngokuqila. Sekusaziwa ukuthi isikolo esithize nxa singaqilanga asiyindawo kumincintiswano.Umaqhuzu weCoca-Cola uVee Chibanda uxoxe loMthunywa ngokukhula kwalumncintiswano.Uthe inkampani yabo izizwa ichelesa ngokuba yingxenye yokuletha ingqubekela phambili kumdlalo kanobhutshuzwayo ezikolo.
