uMthunywa
Intatheli kaMthunywa
KUZWAKALA ukujabula emulini yeqembu leHighlanders esibone ukukhanya ngokuza komqeqetshi omutsha uHendrik de Jongh. Akula loyedwa okhonona ngalumqeqetshi osephenduke waba liqhawe kumidlalo emithathu.
Ukuza kwalumqeqetshi osebizwa ngelithi “Hlabangana” ngabalandeli kudale inguquko. Uyakutsho laye umqeqetshi ukuba ulethe inguquko kundlela alolonga ngayo lokudlala kwabadlali. Labadlali kubikwa sebehlonipha.
Iqula lenkokheli zeqembu zibika ukuba ziyasuthiseka ngokusebenza loHlabangana. UMgcinisihlalo uKenneth Mhlophe uthe benza kuhle ngokukhetha uDe Jongh.
“Lo nguye umqeqetshi ofanele iqembu lethu. Ufike waletha inguquko kuqembu nanko abagadli sebehlohla. Lokhe efikileyo, umqeqetshi usefundise abadlali inhlonipho. Uyenelisa ukuhleka labo, axoxa labo ngenguqu ngendlela abayizwisisayo. Siyambonga ngalokhu ngoba sekuletha injabulo eqenjini lakubalandeli balo,” kutsho uMhlophe.
UMhlophe ubike ukuba indlela abadlali asebevuke ngayo enkundleni itshengisa ukuba sebevuthiwe lokuthi bayakholwa kumbono kamqeqetshi.
“Abadlali yibo esaqalisa labo, sebevukile nxa bedlala. Kuyabonakala kundlela abafuna ngayo ukuhlohla. Sebelambele igedi. Yinto enhle leyo.”
Umqeqetshi omutsha lo wabonakala okwakuqala ehlaziya ithimu mhla idlala leBulawayo Chiefs kumdlalo iBosso eyanqoba ngamabhola amathathu kwelilodwa. Lokhu kwaba yisiqalo kubafana beTshilamoya ukuthi bahlohle ibhola eledlula elilodwa emdlalweni.
U-De Jongh uvale umnyama obuphezulu kweHighlanders owokudliwa mahlayana langamaqembu amancinyane.
Kubalwa ukuvuka komdlalo kubadlali ababalisa uTinashe Makanda, uPrince “Mgadafi” Dube, uRyan “Ndorindori” Lunga, uPeter Muduhwa, uBrian Banda lo-Adrian Silla.
Imvimbi uAndrew Mbiba ngomunye osebukhali ngobungcitshi kulandela ukuza kukamqeqetshi.
Abalandeli beBosso abakhulume lephephandaba bathe kungaba yisimanga esijabulisayo ukuthi iqembu liqede lihlezi kunombolo yesithathu kumbe kweyesine.
UTeekay Ncube olilunga leBosso uthe bayazibuza ukuthi wayevele engaphi sonke isikhathi umqeqetshi.
“Lo ngumqeqetshi okwakumele sibelaye kusukela kudala. Siyazibuza, ukuthi wayengaphi uHlabangana? Kuyavela ukuthi umqeqetshi lo ulesandla ekunqobeni kwethimu kulezi insuku. Abadlali yibo esasilabo kodwa kwakusala ukuthi sihlohle, sekubuye lo omutsha (de Jongh) sesinqoba,” kutsho uNcube.
UKhonzani Sibutha osePlumtree uthe loba bejabula ngomqeqetshi, abakhohlwa ukuthi ufice iqembu elibunjwe nguMadinda Ndlovu.
“Okuhle ngokuhle sibili. Ubuhle beBosso ngabalandeli bayo lomqeqetshi wayo. Maviki wonke ngibukela ibhola ngivela ePlumtree. Ngasengicabanga ukwekela kodwa kwathi sinqoba iBulawayo Chiefs, ngazi ukuthi isivukile ekaMatshobana. Sesithaba lathi njengabanye maviki wonke. Ngithokoziswa yindlela abalichaya ngalo ibhola abafana.”
IHighlanders ngemva kwemidlalo engu-26 ikunombolo yetshumi imumuthe imiklomelo engu-35. Isilela ngemiklomelo emilutshwane ukuthi ifinyelele kunombolo yesihlanu kungalane yeCastle Lager.
UMhlophe uthe kungaba kuhle nxa bengaqeda isizini bethe khoxo kunombolo yesithupha.
“Singaqhubeka sidlala kanje, akumangalisi ukuthi sibalelwa kweyesithupha kumbe phezulu. Inhloso yikuvala isizini sihlezi endaweni etshengisa ingqubekela phambili.”
