uMthunywa
YiNtatheli kaMthunywa
USELE engelankani umqeqetshi weSenegal, u-Aliou Cisse, ngesikhathi iqembu lakhe likhitshwa kabuhlungu yiCameroon emdlalweni wama-quarter-final eCaf Africa Cup of Nations (Afcon) ka-2017 eGabon.
ISenegal yehlulwe yiCameroon nge-5-4 sekutshaywa imbekwa kulandela ukuphela komdlalo kuzindala zombili nge-0-0. Kuphinde kwayiphelela njalo leTunisia yona enqotshwe yiBurkina Faso ngamabhola amabili.
Amazwe la anqoba amaWarriors kuhlandla lakuqala lenkezo le.
Akukho obekusekhanda likaCisse ngaphandle kokukhokhela leliqembu ukuze lidlulele kuhlandla elilandelayo ngesikhathi kuqala i-Afcon. Kodwa ukubhekana leCameroon kutshintshe yonke into.
ICameroon yithimu esihlala imkhipha emncintiswaneni lumqeqetshi. Ku-Afcon ka-2002 uCisse wakhutha umbekwa wokucina engukaputeni weSenegal behlulwa yiyo iCameroon kumdlalo we-final yenkezo. ISenegal yayitshaya ngabadlali abaphezulu ababalisa uTony Silva lomgadli u-Al Hadji Diof. Isizwe lesi sanqotshwa yiCameroon eyayilabadlali abatshisayo ababalisa uSamuel Eto’o.
Lumdlali othenjiweyo uSadio Mane ukhuthe umbekwa wokucina wedlulisela phambili iCameroon.
Ukwehlulwa kweSenegal yiCameroon kwaqala ngo-1992. ILions of Taranga yehlulwa kuma-quarter-finals nge-1-0.
Loba iSenegal ingelinye lamazwe esatshwayo kunguqu yeAfrica, ayikaze iyinqobe ku-Afcon. Okungcono esike yakwenza yikuphuma kumdlalo we-final ngo-2002.
Kusenjalo, iCameroon izadibana leGhana kumdlalo wama-semi-final. IBurkina Faso izadlala le-Egypt.
