uMthunywa
Gerald Sibanda
IQEMBU elidlala kuligi yeCastle Lager Premiership iHwange, kuzamele lidinge abadlali abaqinileyo nxa lifuna ukwenza kuhle lonyaka nanko sokuvele ukuba selifulathelwe ngabadlali balo abalitshumi.
Abadlali bonke laba kubikwa bathe angeke bahlalele indlala ngoba akuphumi mali kuzimbamgodi zamalahle.
Babike ukuba kungcono ukuthi bayedinga amadlelo aluhlaza kulokuthi batshonele ukudla ingqweqwe zomlomo lokutshiswa lilanga leHwange.
Kwabalitshumi laba, kulabadlali abamqoka okuyibo abenza ukuthi iChipangano ibambelele iphinde iqede isizini yanyakenye ihlezi kunombolo engcono kungalane yeligi yeCastle Lager.
Intatheli yeZimpapers Sports Hub ikubika ngokugcweleyo ukuthi iHwange isebunzimeni kumalungiselelo esizini yalonyaka ekhangelelwe ukuthi iqale ekupheleni kukaNhlolanja.
Kubikwa abaqeqetshi beqembu abakhokhelwa nguNation Dube bathwele nzima ukuhlanganisa abadlali abasakhulayo okuyibo abazaphiwa umlandu.
Umqeqetshi weHwange ubike ukuba okwamanje ngeke akhuluma ngabadlali abahambileyo ngoba uphakathi kwamalungiselelo.
Isiphathamandla senhlelo eqenjini uKhumbulani Mbano utshele iZimpapers Sports Hub ukuthi iqembu lizaqina ngokudinga ithalenta kumaqembu alo abadlali abasakhulayo, njengenhlalayenza.
“Bakhona abadlali bethu abasakhulayo abakumaqembu aphansi. IHwange FC ikujwayele lokhu ngoba kuluhlelo lwethu lokuphakamisa abadlali abadabuka kulindawo ngoba iqembu ngelabo. Kumalanga ambalwa azayo sizakhuluma okunengi ngokubunjwa kweqembu lalonyaka,” kutsho uMbano.
Umdlali owaqala ukukhonona ngesiphatho seHwange nguThabani Goredema, owatshela iZimpapers Sports Hub ukuthi “kubuhlungu” ukuba ngumdlali weqembu leli.
UGoredema wabika lokhu ecela amaphephandaba ukuthi asabalalise udaba, kuncedwe abadlali bathole imali.
Omunye wabadlali ofulatheleyo nguNedrick Madeya otshiye iqembu wangena kuGreenfuel.
Umgadli uKelly Shiyandindi kubikwa ukuba usekuChicken Inn kunye lomgadli uBrighton Makopa.
Abadlali ababalisa uTendai Muvuti kulindeleke ukuthi baphakamise iqembu kulisizini kunye labadlali abatsha
Kusenjalo, umdlali weGreenfuel uXolisani “Scara” Moyo kubikwa ukuba ngomunye wabadlali abazadlalela iChipangano ngesizini yalonyaka kunye labanye abadlali ababalisa uNewman Sianchali, Winston Mhango loPhakamani Dube owaye kuZPC Hwange.
