uMthunywa
YiNtatheli kaMthunywa
IZIMBABWE idibana lesizwe seNew Zealand kumidlalo emihlanu yekhilikithi kusukela ngeSonto kuviki ezayo kodwa kubikwa kulempi phakathi kwabadlali besizwe.
Kubikwa abadlali bamaChevrons batshelwe ukuthi kuzakhethwa labo abalethalenta labatshengisela ukuthi bafuna ukunqoba.
Kulomdlali oyedwa, uChristopher Mpofu, okuzwakale etshayelwe ihlombe ngumqeqetshi uDav Whatmore.
UMpofu ubalelwa kulabo abadlala kuhle ngesikhathi i-India ivakatshele eHarare.
Ekuqaleni kweviki le, umqeqetshi wesizwe uWhatmore utshintshe ukwenza wabika ukuba uzakhetha ithimu yakhe sekusele amalanga amalutshwane ukuthi badlale lamaBlack Caps.
Abafakazi abaseduzane lama-Chevrons bathe ithimu ilolonga okuzwayo nsukuzonke njalo uWhatmore uqina ngokulungisisa indlela ithimu evimba ngayo ibhola.
Ukuvimba ibhola kukhanya yikho okubuyisela iZimbabwe emuva, ngokubona komqeqetshi.
INew Zealand ingena kuleli ngoLwesithathu oluzayo.
Kusenjalo, inhlanganiso yeZimbabwe Cricket iqina ngokuthi akulamdlalo ozaqhutshwa koBulawayo.
Lokhu kutsho ukuthi inkundla yeQueens Sports Club izaphetha umnyaka lo ingadlalelwanga ngamathimu aphetsheya.
IZimbabwe Cricket yabika ukuthi ukuletha imidlalo koBulawayo kuyadula.
IZimbabwe ilenkundla ezimbili ezavunyelwa ukudlalewa ikhilikithi yomhlaba — iQueens leHarare Sports Club.
Abalandeli abaseHarare sebekholise kakhulu ukubukela intshantshu ezivela kwamanye amazwe, kuthi labo abakoBulawayo lakwezinye indawo eziseduzane babukela kumabonakude.
Imidlalo yonke izabe iseHarare njalo.
