Kuvulwa inkundla ze-basketball

16 Nov, 2023 - 00:11 0 Views
Kuvulwa inkundla ze-basketball umfanekiso ogciniwe: abadlali be basketball

uMthunywa

Nkosilathi Sibanda

UMDLALO we-basketball usuphendukile esabelweni seMatabeleland North nanko amaqembu amahlanu asezinikele kuligi entsha eqala kulimpelaviki eHwange.

Iligi le kubikwa izabe ingaphansi kwenhlanganiso yeMatabeleland North Basketball Association. Kuzancintisa amaqembu amahlanu abalisa iVictoria Falls Panthers, Victoria Falls Suns, Black Hornets, Madumabisa Titans leRoyal Eagles.

Imidlalo yokuqala kuhlelwe ukuthi iqale mhlaka 18 Lwezi. Isizini ikhangelelwe ukuthi igqitshwe mhlaka 27 Zibandlela ngomnyaka ozayo, kubika abaqoqi bemidlalo ngesikhathi bekhuluma leZimpapers Sports Hub.

Kuzadlalwa enkundleni zeVictoria Falls Club eFolosi laseHwange Training Club ngoba yizo indawo ezilezakhiwo zomdlalo we-basketball ezingcono isabelo sonke.

Ukuqalwa kutsha kwemidlalo kube zindaba ezimnandi kubadlali bakulesi sabelo ngoba besekwedlule inyanga bengelamncintiswano. Umdlalo we-basketball esabelweni seMatabeleland North wasabalala okuzwayo kodwa wasilela ngesikhathi seCovid-19 waze wavuka ngomnyaka ka2022 sekudlalwa kumiqhudelwano yobungane ebizwa ngokuthi “Colorful Weekends”.

Imidlalo le kayizange ilethe inguquko kangako. Imidlalo le ibisetshenziswa ukuhlolisisa ukuqina kwabadlali lokubenqabela ukuthi bengathatheki kuzidakamizwa esezibhidlize impilo yabasakhulayo.

Umphathintambo we-basketball kulesi sabelo uPenrick Ndlovu utshele intatheli yephephandaba likazulu ukuba amathimu avumelane ukuthi kumele kube lemidlalo yeligi eqhutshwa kuhle ezaletha umncintiswano odingakalayo kulindawo.

Uthe kunyanga ezimbili ezizayo inhlanganiso yeMatabeleland North Basketball Association izaba lenhlelo ezithokozisayo, ezizaphakamisa i-basketball lethalenta labadlali.

“Kulokujabula okukhulu ngemidlalo emitsha ye-basketball eMatabeleland North njengoba sikhangelele ukuthi siqalise isizini ngokuphangisa mhlaka 18 Lwezi. Lokhu kuzindaba ezimnandi kithi ngoba ekucineni sizaqhuba imidlalo yokuncintisana. Besikulangazelela okwesikhathi eside lokhu.

“Sesibeke uhlelo oluzakwenza amaqembu ahlale esenkundleni ngempelaviki zonke size siqede mhlaka 27 Zibandlela ngomnyaka ozayo. Phakathi kweligi kuzaba lemincintiswano ethile ezaphathisa amaqembu,” kutsho uNdlovu.

Emidlalweni yokuvula isizini, iqembu leBlack Hornets lizadlala leVictoria Falls Suns. IMadumabisa Titans izadibana leRoyal Eagles. Iqembu leVictoria Falls Panthers lizangqikilana leBlack Hornets kuthi eleVictoria Falls Suns kuhlelwe ukuthi lidlala le-Eagles kumdlalo walo wesibili kulolusuku.

Kulindeleke ukuthi imidlalo yokucina yeligi le idlalwe kusukela mhlaka 13 Zibandlela kusiya kumhlaka 27 ngenyanga efanayo.

Umaneja weVictoria Falls Panthers uBrighton Musaidzi utshele iZimpapers Sports Hub ukuthi sebelindele ukuqala kwemidlalo.

“Sifuna ukwenza i-basketball ibenkulu eMatabeleland North. Njengoba sesilamaqembu azinikeleyo ukuthi azakwenza konke okusemandleni kutsho ukuthi i-basketball isibuyile kithi,” kutsho uMusaidzi.

Ukuvuselelwa kwemidlalo ye-basketball kuza ngemva kokuba iqembu leVictoria Falls Panthers lenze umqhudelwano wokusabalalisa lumdlalo endaweni ezingaphandle kwedolobho leFolosi.

Imidlalo yangempelasonto:

Black Hornets v Victoria Falls Suns, Madumabisa Titans v Royal Eagles, Victoria Falls Panthers v Black Hornets, Victoria Falls Suns v Royal Eagles

Share This:

Sponsored Links

Survey


We value your opinion! Take a moment to complete our survey

This will close in 20 seconds