uMthunywa
YiNtatheli kaMthunywa
USOMABHIZIMUSI wakoBulawayo uPriscah Sibanda usevule ikolitshi lokuqeqetshisa umdlalo we-chess ezikolo ngenjongo yokuthuthukisa lumdlalo kuleli.
Ikolitshi leli elibizwa ngokuthi yiChess Mates Academy lisungulwe ngoMgqibelo kumbuthano owenzelwe esikolo seMontrose Girls High njalo usekelwe ngabantwana bezikolo lamabhizimusi azimisele ukuphathisa ukukhula kwalumdlalo.
Ekhuluma lephephandaba likazulu uSibanda uthe ikolitshi leChess Mates Academy lizaphathisa inengi labafundi elilephupho lokudlala i-chess.
“Sisingula iChess Mates Academy ngoba sijonge ukuthi sincedise abantwabethu abasezikolo abalothando lomdlalo lo.
Eminye imidlalo iyathola usekelo kodwa i-chess idedela emuva. Ngakho ke, ngemva kokuzwa ngembali yabantwana abakwabitha lumdlalo koBulawayo, ngakubona kubalulekile ukuthi ngihlanganise umbono wami lequla engisebenza lalo.
“IChess Mates Academy izaletha inguquko kubadlali ngokubanikeza ithuba lokuzibonakalisa. Mhlawumbe singathola abadlali abazamela isizwe bephuma kulindawo,” kutsho uSibanda.
Usomabhizimusi lo usethole inhlonipho ezikolo zakoBulawayo lakuzabelo zeMatabeleland ngokuphathisa kwakhe kwezemidlalo.
Umphathisikolo weMosi oa Tunya High uRonny Sibanda uncome umsebenzi owenziwa yiChess Mates Academy wathi kuyisiqalo sokuthuthukisa isizwe.
“Zibanjwa zisesemaphuphu, yikho lokhu okwenziwa nguPrisca Sibanda labanye bakhe kuChess Mates Academy. Siyabonga ngombono lo wokukhuthaza abantwabethu ezikolo ukuthi bafunde umdlalo we-chess,” kutsho uSibanda ngomunye wabaphathi abathe bazasebenza lekolitshi elitsha ukuvuselela umdlalo.
Umdlalo we-chess ulokhe usadinga udumo kuleli nanko phela balutshwane abawukhwabithayo loba nje usuleminyaka eyedlula amakhulu wasungulwa.
Umdlalo lo waziwa kakhulu kuzikolo ezitholakala enzikini yedolobho njalo akujwayelekanga ukuthi abantwana bemalokitshini bawuthakazelele.
USibanda uthe ikolitshi elitsha leli lizasabalala lasezikolo zasemalokitshini lidinga ithaletha.
“Sizangena lasezikolo ezisemalokitshini lalezo ezikundawo eziseduzane ledolobho lakoBulawayo.
“Sifuna ukumemetheka indawo zonke zelizwe ngoba injongo yethu ngeyokuthi sikhulise umdlalo.”