uMthunywa
IQEMBU lesizwe kumdlalo wokuqaga, ama-Gems, liqale kuhle kumidlalo yokukhankasela iWorld Cup ka2023 ngemva kokunqoba kumidlalo emibili yakuqala kulumncintiswano oqhutshelwa eSouth Africa.
Kumdlalo wakuqala, iZimbabwe inqobe iBotswana nge 49-41 ngeSonto. Ama-Gems atshengisile ukuthi alande ukuyanqoba nanko phela aphinde adlula phezulu kweNamibia nge 45-41 kumdlalo wesibili.
Ukuqala kuhle kwabodade belizwe laba kuzabavulela indlela yokuthi benze kahle lapho behlangana leTanzania leSouth Africa kumidlalo ezayo.
Kwelinye iqula lamazwe ancintisayo kuleMalawi, Kenya, Eswatini leZambia.
Loba abasekeli beqembu leli bebebalutshwane, banike abadlali isibindi sokwethula ithalenta labo kulumncintiswano odibanisa intshantshu zamazwe.
Kumdlalo leBotswana, amaGems aqale ehamba phambili nge 13-8 kusigaba sokuqala somdlalo, ngaphambi kokuthi iBotswana ithole ithuba ize ngamandla.
Umdlalo othenjiweyo kuleli uJoyce Takaidza udonse nzima kulumdlalo ngemva kokuhlangana leqembu selifikile eSouth Africa. Kubizwe omunye umdlali uSharon Bwanali ukuthi athathe indawo yakhe, wafika wenelisa ukuwathela emambuleni amabhola.
Ekhuluma lentatheli yephephandaba likazulu, umsekeli kamqeqetshi weqembu uTatenda Shinya uthe bafike kulumncintiswano belenjongo yokunqoba.
Sharon Bwanali
“Sihlezi siqaphele ukuthi singaphambuki kunhloso yethu yokunqoba,” kutsho uShinya.
“Sidlala lamazwe okwaziwa ukuthi zintshantshu zomdlalo wokuqaga kuzwekazi le-Africa ngakho asifuni ukuthi siyekethise. Size lapha silenjongo yokunqoba.”
Gems
Emdlalweni odibanise ama-Gems leBotswana, umdlali wakuleli uTafadzwa Matura ukhethwe waba ngumdlali owedlule abanye.
Inengi labadlali abakumncintiswano lo babeyingxenye yeqembu elatshayelwa ihlombe phakathi kwalumnyaka ngokuphumelela ukuyancintiswa kumidlalo yeVitality World Cup kuminyaka emithathu edluleyo eNgilandi.
Kusenjalo, uHulumende, emelwe yinhlanganiso yeSports and Recreation Commission ubike ukuba uzasekela ama-Gems ngakho konke okungafunakala belungiselela ukuya ku-World Cup. Amehlo azathi nhlo kuleliqembu kulandela ukumangalisa inengi ngokufika kunkezo yomhlaba ngeminyaka edluleyo.
