uMthunywa
Innocent Kurira
SEBENGAPHEZULU kwe-1 500 ababhalise ukugijima kumjaho wePPC Matopos Marathon, okutshengisela ukuthi sebebanengi abantu abakhwabitha ukuncintisa kulumdlalo.
Inani leli lingakhwela kusiyafika mhla welanga lokuncintisa.
Umjaho lo, okhona ngeSonto, ungamakhilomitha angamatshumi amahlanu lantathu njalo usukela eMatopo usiyacina koBulawayo. Usekelwa yinkampani yesamende eyePPC Zimbabwe.
Kubikwa ozatshaya intambo kuqala uzaphiwa i$2 000 kumahlandla abesilisa labesifazane.
Okunye okungabe kwenze inengi labantu bakhwabitha ukuncintisa yikuthi kukhwezwe imali yomvuzo.
Umgcinisihlalo wenhlanganiso ephethe umdlalo wokugijima iBulawayo Athletics Board, uWatson Madanyika ubikele iZimpapers Sports Hub ukuba kuzagijima abantu abanengi ukwedlula labo ababekhona ngomnyaka ka-2029 lapho okwacina ukuqhutshwa lumncintiswano, andubana kuvele umkhuhlane weCovid 19.
“Lonyaka banengi abantu ababhalise ukuzoncintisa kuPPC Zimbabwe Matopos 33-Miler. Ngomnyaka ka-2019, kwagijima abantu abangu-3000 kodwa khathesi, ngendlela abantu abafuna ukugijima ngayo, sikhangelele ukuthi inani ledlule lapho.
“Ukubhalisa kuyaqhubeka kuze kufike ngoLwesihlanu mhlaka 5 Mabasa enkundleni yeBulawayo Athletic Club (BAC). Yikho lapho Abagijimi abazathola lempahla yabo yokugijima. Ukuza kwabantu abanengi kuyasikhuthaza njengabaphathi bomdlalo koBulawayo,” kutsho uMadanyika.
Umbiko ovele kunkampani yePPC uthe inkampani le izaqhubekela phambili isekela umdlalo wokugijima kuleli.
“Sisebenza lomphakathi weMatopo ukuze sincedisane, ukuze sazi ukuthi yini esingayenza kulindawo ezaphathisa abantu. Silecebo lokwakha ikilinika loba isikolo. Konke lokhu kuvela ekuthini iPPC Zimbabwe ilohlelo lwayo lokusebenzelena labantu okuyibo abasekela inkampani,” kutsho lumbiko.
Umjaho lo uzaqalisa emadabukakusa egedini lephakhi yeMatopo kuqondwe koBulawayo lapho abakhangelele ukuthi ozanqoba umdlalo atshaye intambo ngaphansi kwehola elilodwa.
Kukhangelelwe ukuthi kuncintise intshantshu ezijwayele ukungasileli kumijaho enjengale. Amathimu enhlanganiso zamapholisa, ogadijele lamasotsha, zandise ukubuthanela imincintiswano enjengale.
