uMthunywa
Fungai Muderere
ABADLALI benguqu abangamankazana sebephiwe ithuba lokutshengisela ithalenta labo nanko sekusungulwe iqembu elitsha koBulawayo, eleNtumbane Stars.
Iqembu leli libunjwe ngusaziwayo kulumdlalo uFortune “Fokoza” Ncube. Ukusungulwa kwaleliqembu kuza ngesikhathi inhlanganiso ephethe umdlalo wenguqu umhlaba wonke, iFIFA ikhuthaza ukuthi kube lamaqembu abesifazane, ngaphansi kohlelo lwe-club licensing.
UNcube utshele intatheli yephephandaba likazulu ngoLwesibili ukuba injongo yokubumba iNtumbane Stars ngeyophakamisa abantwana abangamankazana kunye lokukhankasela amalungelo abesifazane kwezemidlalo.
“Selikhona iqembu esilibize ngokuthi yiNtumbane Stars. Iqembu leli liyingxenye yeNtumbane Stars Football Club.
“Sifuna ukuthi sikhuthaze abantwabethu abangamankazana ukuthi batshengisele ithalenta abalalo kumdlalo wenguqu,” kutsho uNcube.
UNcube uthe ngokusungula leliqembu ubekhuthazwe ngamanye amaqembu amakhulu abalisa iHighlanders, FC Platinum, Ngezi Platinum Stars lamanye alamaqula abesifazane kuleli.
Kuminyaka edluleyo, ilokitshi leNtumbane belidume ngokuba liqembu labadlali besifazane eleNew Orleans. Kuleliqembu kwakulabadlali ababalisela uSithethelelwe “Kwinji” Sibanda, Nomsa “Boyz” Moyo loPrecious “Gringo” Mpala.
