uMthunywa
Lovemore Dube
OGIJIMA imango emide emele ilizwe u-Isaac Mpofu ugijime kuhle edolobheni leValencia eSpain.
Uqede ekunombolo yamatshumi amabili lane (24) kulumjaho lapho obekuncintisa intshantshu ezivela emazweni atshiyeneyo.
Ngenani labagijimayo abancintise lapha, uMpofu wenze kuhle.
Ngesikhathi asithethe egijima lumncintiswano, kuveze ukuthi ulalo ithuba lokwenza kuhle ngoba ungomunye okukhangelelwe ukuthi anxuswe kuma-Olympics, azakwenzelwa edolobheni leParis, eFrance ngomnyaka ozayo.
Uthethe amahola amabili lemizuzu eyisikhombisa lemizuzwana engamatshumi amathathu lesitshiya galombili. Lesi bekuyisikhathi esihle ngoba singaphansi kwamahola amabili lemzuzu eyisitshiya galombili, eyiyo engumgoqo othi umuntu ulalo ilungelo lokuncintisana labanye kuma-Olympics.
Sokuyisikhathi sakhe sesithathu sokugijima umango we42km ngaphansi kwamahola amabili lemizuzu elitshumi.
UMpofu uhlala edolobheni lakoBulawayo njalo uyinzalo yesiqintini seTinde, eBinga.
Sokukhangelelwe ukuthi angagijima umjaho owodwa owe42km kungakafiki uNtulikazi ka2024 ukuze abhekane lamaOlympics elomdladla wokwenza kuhle.
Kuma-Olympics iZimbabwe ike yagijinyelwa ngu-Abel Nkhoma, Tendai Chimusasa, Mathias Kanda loRabson Mulombe.
