uMthunywa
Nkosilathi Sibanda
INHLANGANISO yePremier Soccer League (PSL) ibike ukuba imidlalo izaqalisa mhlaka 9 Mbimbitho.
Ukuqala kwesizini le kuze ngesikhathi inkundla zakuleli zilokhe zikusimo esibi. Ngokudingisisa kwephephandaba likazulu kumaviki adluleyo, kuvele ukuba akulangitsho inkundla eyodwa elungele ukuphatha imidlalo.
KoBulawayo, inkundla ezithenjiweyo yiBarbourfields leLuveve. Enkundleni zombili akulamanzi, okuyikhona okukhathaza amaqembu labalandeli benguqu.
Nyakenye iphephandaba likazulu labika ngaloludaba kodwa akulanto eyatshintshayo.
Ukuswelakala kwamanzi kuzadala ukuthi kube lokumemetheka komkhuhlane wesihudo, wona osubhahile endaweni ezinengi kuleli.
Ngesizini edluleyo, manengi amathimu akhonona ngenkundla ezilamagodi, ezingacentwayo lezambuzi ezinukayo.
Ukukhonona ngesimo senkundla kuveze ukuthi iqula le-First Instant Board (FIB), elihlola inkundla lezi lisolwe kakhulu.Kumalanga ambalwa adluleyo, iqula leFIB libonakale lihlola inkundla ezinengi, kulungiselelwa ukuvulwa kwesizini.
UMthunywa ukhulume lesinye isiphathamandla kuPSL esibike ukuba ukukhalaza ngesimo senkundla lokhu akusinto entsha kodwa kubalulekile ukuthi kulungiswe lapho okulensolo khona.
Isiphathamandla lesi sibike ukuba kunengi okwenza inkundla zakuleli zingakhethwa kumidlalo yaphezulu kubangelwa yikwehluleka ukuzigcina kuhle.
“Kambe kuyoze kube nini sihlala sikhala ngokuthi inkundla kazilungisiswe. Kukholisa amathimu asebenzisa inkundla ezakhiwe kuhle.
“Zikhona inkundla othi nxa uzibona usole isimo sazo. Isimanga yikuthi ngenxa yokuswelakala kwenkundla, imidlalo yeligi ephakemeyo icina isidlalelwa lapho okungamelanga idlalwe khona,” kutsho lesi isiphathamandla esikhethe ukuthi singaqanjwa ngebizo.
Abalandeli bomdlalo labo bakhonone kakhulu.
USipho Ndlovu ongumsekeli weChicken Inn uthe isimanga yikuthi labaphathi bomdlalo bayakuvumelana.
“Isimanga uzafica leziphathamandla zenguqu zibukele imidlalo kunkundla esikhuluma ngazo.
Kungathiwa kayidlalwe yikho lokho,” kutsho uNdlovu.
UNorman Ncube osekela iHighlanders uthe: “Mina engikusola kakhulu yikuthi kungani sidlalela enkundleni ezingelamanzi. Abantu bazagula bahawule lonyaka. Kambe ungabukela ibhola okwamahola amabili, wehluleke lokunatha amanzi kumbe uyezikhulula esambuzini?
Isikhulumi sePSL uKudzai Bare uthe kuyisifiso sabo ukuthi inkundla zenguqu zakhiwe ngendlela ezasuthisa wonke umuntu.
Abacubunguli benguqu sebekhulume bengaqedi, bekhalaza ngokuthi isimo senkundla lesi sidala ukuthi iZimbabwe incitshwe ithuba lokuqhuba imidlalo yaphezulu.
Kungumbono wenengi labantu ukuthi angeke kusolwe iZifa lePSL ngoba kungumlandu wabanikazi benkundla ukuthi zilungiswe.
Abanikazi benkundla ezinengi kuleli ngamakhansili. Kungumlandu wamakhansili la njalo ukuthi bakhe inkundla ezilungele inguqu.
