uMthunywa
Silo Ophezulu Stinta kugwalo
UDumazile wayibhala phansi inombolo yocingo lwakhe kwasekumele-ke babonane. Njengesithembiso uMoloi wamtshayela uDumazile wabeka ilanga lokuthi bake bahlale phansi baxoxe ngendaba yabo eyayingela msila ingela khanda. Wayengethuki ngitsho uDumazile lokuthi kwakungaqhamuka uMtalaselwa lapha ekhaya wayengayilandisa ngaluphi uhlobo kodwa indaba engaka phezu kokuthi yena vele wayeke watshayelwa ukubuya kukaSithole lapha ekhaya, zazinzima indaba zikaDumazile labesilisa.
Lwafika-ke usuku olungaliyo, badibana uDumazile kanye loMoloi lapho uMoloi enelisa khona ukuphicaphica uDumazile ngamazwi laye wathatheka esezwe elithi wayezimisele ukulungisa konke okwakuphambanisekile phakathi kwengane kanye labazali bakaDumazile lapho uDumazile esezwe ukuthi uMoloi wayezimisele ukuhlawula abazali bakaDumazile, wajabula wabamba amayezi, kuyisimanga ukuthi labo abazali bakaDumazile babezimisele ukuhamba besidla behlawulisa kuphela ngengane yabo bengananzeleli lokuthi yayisesandleni senye indoda.
Asibezwa bephosa ilizwi eligobisa njalo liyilelo elikhuza indodakazi yabo.
UMtalaselwa waqala ukuthola incingo ubuthumuthumu ngesikhathi eseMgungundlovu njengoba wayesebenzela kude lomuzi wakhe. Omakhelwane ,abangane kanye lezihlobo zazibika nje ukuthi kukhona okwakunuka santungwana lapha ekhaya.
Wazizwa ephela amandla uMtalaselwa wayifunda ivaliwe ukuthi inyama yayingeke nje inuke ingosiwanga. Wazama lokufika ekhaya ngezikhathi ezingajayelekanga ngethemba lokuthi wayezazibambela mathupha lokho ayekuzwa ngabantu. Kwaba kuhle-ke ukuthi kazange athatheke ahle nje asuse amanqe. UMtalaselwa wasuka nje into yonke wayithatha ngobunono obukhulu kazange afise lokuthi uDumazile ahle abelelihlo elisolayo. ULerato indodakazi kaDumazile yaboniswa uyise, uMoloi layo yaba lenjabulo ukuzwa elithi lo kwakunguyise okucaca ukuthi oyise laba ababili ayeke wahlala labo wayecaciselwe ukuthi kwakungayisibo oyise labo.
UMoloi waqala ukwazi ukuthi ingane iyagqokiswa ngalelo langa, kambe konke lokhu wayekwenza ngenhliziyo elobuqotho na. Abantwana bakaDumazile basebeqalisa ukugila imikhuba lapha ekhaya sebeqalana ngoyise, omunye sengobona uyise engcono. Impi le kwanceda nje kakhulu ukuthi yenzakale uMtalaselwa engekho egumeni kanti wayezakuzwa njani lapho esesizwa izingane zimemezwa oyise abatshiyeneyo phakathi kothango olubiza yena njengendoda.
Unina wazama ukubakhuza kodwa kwakucaca nje ukuthi isivele yangena ngenxeba. Okwasekumisiwe phakathi kukaDumazile kanye loMoloi yikuthi balubhekise ngakibo kaDumazile uMoloi ayebhadala amacala akhe.
