uMthunywa
YiNtatheli kaMthunywa
AKULAQEMBU elizethemba njengeDynamos esibike ukuthi izaphakama iye esiqongweni seligi yeCastle.
Lokhu kukhulunywe ngumqeqetshi wayo uLloyd Mutasa.
Umqeqetshi lo utsho lokhu ngemva kokuba iDeMbare itshaye iTsholotsho 1-0 eMagumeni, eBarbourfields ngoMgqibelo odluleyo.
Ibhola elihlohlwe yiDynamos lingene kulandela ukuphiwa kwayo umbekwa. U-Ocean Mushure unamathisele emambuleni umbekwa lo ngomzuzu wesithupha kuhlandla lakuqala, onikeze iDynamos injabulo ekade yayicina.
Ukunqoba kweDynamos kuyitshiye izitshaya isifuba, ilethemba lokuthi ingaphenduka embusweni wenguqu yakuleli.
Umqeqetshi uMutasa uthe ukunqoba abakwenzayo kuzavula inhlanhla.
“Kungenzeka loba yini kumidlalo yethu. Okwamanje kusabusa amanye amaqembu thina sidlalela phansi. Abadlali bami kufanele bazimisele njengoba uhambo lwethu lokuya phezulu kwelogu lulude,” kutsho uMutasa ngoLwesithathu ekhuluma loMthunywa.
Uthe akumelanga abadlali bakhale ngokukhathala ngoba umdlalo wabo leHighlanders utsho okunengi.
“Okusegcekeni ngalesigaba seligi yikuthi iHighlanders lamanye amathimu ilabadlali abaqinileyo ukwedlula thina.
“Akumelanga sikhale ngalokhu, kumele silungisise njalo ukuqina kwethu kuzabonakala lakumdlalo lo esiwunxusela iHighlanders.”
Umqeqetshi lo ukholwa ukuthi umdlalo wangoMgqibelo lo uzaya ngokuthi abadlali bakhe baqine okungakanani.
“Lasebhentshini kumele ngibophe ziqine. Nxa singanqoba kuHighlanders ngizavuma ukuthi iDynamos isiphendukile.
Kodwa akusoze kube lula ngoba layo iHighlanders iyasisongela.”
UMutasa utshayele ihlombe abadlali bakhe ngokuthi bayamethemba ukuthi nguye umqeqetshi ozaphakamisa ithimu le. Ukhulume kabanzi ngomdlalo kaMushure wathi utshengisela ukuthi ulomfutho wokunqoba.
“Ngiyajabula ngendlela abadlali bonke abadlale ngayo. Kuhle ukuthi uMushure wasihlohlela sidlala leTsholotsho. Kuyajabulisa sibili.
“Ngizathanda ukukhuthaza abadlali bami bonke ukuthi badinge ibhola balihlohle. Le yiyo indlela esinganqoba ngayo iligi.”
Uthe akudingakali ukucatsha ngokuthi abadlali abenzi kuhle ngoba ukukhombana ngeminwe kuwisa ithimu.
“Abalandeli bethu abafunde ukubekezela. Angeke sibeyi Dynamos eyaziwa ngodumo lwayo lokubayintshantshu nxa siphethe sikhombana ngeminwe.”
UMutasa uthe kuzabamnandi ukutshaya iHighlanders ngoba yiyo ithimu eqotshwe ngabadlali bakhe.
