uMthunywa
ABATHANDI labalandeli bomdlalo kanobhutshuzwayo bazangena mahala enkundleni yeBarbourfields ngoMgqibelo kumdlalo womkhankaso wenkezo yamantombazana ama-Under 20 phakathi kweZimbabwe lesizwe seMalawi.
Akubizwa ozwayo kulumdlalo lapho inhlanganiso yeZifa edinga ukuthi ihuge inengi Emagumeni. Ngeviki edluleyo kungene ihlekana lababukeli emkundleni efanayo kudlala amantombazana ama-Under 17 ngesikhathi edliwa yiBotswana.
Isimemezelo seZifa lesi siza ngesikhathi umdlalo wenguqu yamantombazana uswela usekelo lwabantu. Abedluli ngitsho amatshumi amabili abantu ababukela imidlalo yabesifazane lakumidlalo yeligi izwe lonke.
Amaqembu womabili adinga ukuthi athole ithuba lokuyadlala lengcitshi zomhlaba kumqhudelwano ozabe use-Costa Rica lasePanama ngoNcwabakazi.
“Sinanzele ukuthi ayikho enye indlela yokuthi siphakamise inguqu yethu. Asingeneni enkundleni ngobunegi sisekele iqembu lama- Young Mighty Warriors kumkhankaso wokuya kuWorld Cup,” kubika iwofisini yeZifa ngoLwesibili.
Lomqeqetshi weZimbabwe uRosemary Mugadza uthe ukhangelele ukuthi ancediswe yibunengi babantu ukuze anqobe. Ebikela intatheli ngamalungiselelo omdlalo ngoLwesithathu ekuseni, uMugadza uthe uyajabula ngokuphenduka eBarbourfields.
“Umdlalo lo uqakatheke kakhulu njengoba sikhangele ukuyafika kuWorld Cup. Ubunengi babasekeli bethu buzaphathisa kakhulu
ukukhuthaza abadlali bami. Ngithabiswa yikuthi sizadlala eBF, le yinkundla elembali yokuphumelela kwamaqembu esizwe. Kumele sinqobe,” kutsho uMugadza, owenza udumo kunkundla efanayo ngesikhathi engumdlali lalapho eseqeqetsha iqembu elikhulu.
Kuhlandla lakuqala lomdlalo, amazwe womabili aphetha engutshiki lobhanqa nge 1-1 egcekeni leKamuzu Stadium.
