uMthunywa
KONKE sekumi ngomumo kumalungiselelo omcimbi wokunikeza imiklomelo kuligi yomdlalo wokuqaga eyeRainbow Netball League (RANL).
Umcimbi lo uzaqhutshwa eHigh Achievers Coach International Academy, eBorrowdale eHarare mhlaka 13 Zibandlela.
Imidlalo yesizini ka2023 kuRainbow Netball League yaphela ngenyanga kaLwezi njalo bekulamaqembu alitshumu lasithupha.
Intshantshu zeligi le, iGlow Petroleum Queens, esinqobe kathathu amasizini elandelana, izaphiwa umvuzo wemali lenkezo. Iqembu eliqede likunombolo yesibili, eleCorrectional Queens kubikwa lalo lizathola imali.
Abaphathi beRainbow Netball League babike ukuba lonyaka umcimbi wabo uzasungula isicoco esitsha ese- People’s Choice Award, lapho abalandeli bomdlalo abaphiwa khona ithuba lokuvota.
Ekhuluma lentatheli yeZimpapers Sports Hub, uNobhala weligi le, uMoses Gukurume uthe amalungiselelo abo aqhuba kakuhle.
“Amalungiselelo ethu ahamba kuhle njalo silethemba lokuthi kuzaba ngumcimbi othokozisayo. Lonyaka kulotshintsho ngokusungulwa kwesicoco sePeople’s Choice. Lokhu kuyajabulisa kakhulu ngoba kunikeza abalandeli bemidlalo yethu kunye labaxhasi bethu ithuba lokukhetha abadlali abacabanga ukuthi benze kuhle ngesizini ka-2023,” kutsho uGukurume.
Uthe ukuqhutshwa kwalumcimbi kuzandulela amalungiselelo abo okuqala isizini entsha.
“Sisiyaphambili, sikhangelele umnyaka omutsha oka-2024. Sikhangelele ukuthi siqondise lapho esaphambanisa khona, silungisise ngokuphangisa ukubhaliswa kwabadlali. Sesananzelela ukuthi abadlali bayatshintsha amaqembu kodwa bengela maphepha asemthethweni, njengokuphawulwa yiligi yethu.
“Ngokunjalo, sikhuthaza abadlali ukuthi babhalise ukudlalela iqembu elilodwa lokuthi bathole ichence lokudlalela iqembu elilodwa kuligi yethu,” kutsho unobhala lo
