uMthunywa
Silo Ophezulu Stinta
Ngeviki edlulileyo sitshiye uMaMsie engocunuke kakhulu ngengane eyayithutshe loNgonyama yena ejahe ukuziyela emdlalweni lapho ayesiya zikholisela khona.
Ababili laba baqhubeka bephoselana amazwi, uMaMsie kungengo lokhu kodwa okubona kukuhle. Ukhala ngokunganakekelwa kodwa ke uNgonyama uyamchazela ukuthi ukukholisa kwakhe lokho yena kahambelani lakho ngitsho.
Okunye njalo utshona emsebenzini afike endlini ediniwe, umzimba ungasavumi lokuthi athini. Okunye, umsebenzi kaNgonyama ngowokuthembeka nxa ezabonakala emdlalweni yotshwala abantu bazamkhangela ngelithini.
Lapha ke siyananzelela ubuntu obakha uNgonyama kanye lesimilo sakhe esiqoqekileyo.
UNgonyama ngowesilisa onganathiyo, ongabhemiyo futhi kuyisimanga ukuthi konke lokhu sikuthola kusenziwa yinkosikazi yakhe.
Yena uMaMsie kakunanzeleli konke lokhu, ukuthi kuyamlulaza isithunzi sakhe. Ngokuzithoba uNgonyama uhlala phansi engajahanga ndawo. Umchazela kamhlophe uMaMsie ukuthi phezu kweminyaka elitshumi lanhlanu betshadile kakukho lokukodwa amfihlela khona ngokuziphatha langokwenza, kodwa kuyisimanga ukuthi lokhu ebukele yena MaMsie eguquka njengomwabu. Lokuthi wayengamathe lolimi lotshwala wayemfihlele uNgonyama konke kuvela sephakathi komtshado.
Konke lokhu uNgonyama wakubekezelela ngelithi wayemthanda okwedlulisileyo.
Izenzo zakhe lezi kaziluguqulanga uthando luka Ngonyama kuMaMsie, uthi lakhathesi ngisakuthanda ngoba ungunina wabantwabami kukhasi 12. Konke lokhu uMaMsie kakunanzeleli yena ukubona kuyikubaliselwa lokuhlutshwa. UKhotso wayekhohlakele loba ababili belokhu bephikisana ngezabo. Baze bamkhumbula sebesizwa esekhwehlela.
UNgonyama wayelokhu edidekile ngenkulumo zika MaMsie ezazingela siphetho. Wazama ukuthi amlandisele ngokufika komntwana lo lapha ekhaya kodwa uMaMsie watshaya isicathulo waphuma sengathi kafuni kubanjaniswa lendaba ka Kotso.
Wasukuma uNgonyama edinga okudliwayo endaweni yokukhudumeza ukudla.
Kodwa kwakukhala impukane lapho. Wamemeza ebuza uMaMsie owamazisa ukuthi ngalelo langa wayethe bangaphakulelwa kudla njengoba kwakuyiwa emdlalweni wako Zat kulapho ababezakudla khona.
Wabona kungcono ukuthi asukume azame umzamo, esezamela uKotso kodwa lokhu. Yena wayesevele esuthi amazwi kaMaMsie. Wadinga lomuthi wokukhwehlela ukuze anathise uKotso.Ngumuntu owayelesineke uNgonyama wayengeke ayilahle ingane kaBubbles, yayingazi lutho yona.
UMaMsie wayesephenduke wazigoqa esihlalweni esibutifitifi ethule egoqe izandla.Wayekuhlasele ngelengulube okuKotso ngesikhathi kusidla ethi nje ngaphakathi kudla engathi kuqabuka ukudla lokhu.
Wayengelaso ngitsho isihelo.OkuKotso kwakusidla kugogosa sengathi kuthi elakusasa kalaziwa. Kwadla kwabonga uNgonyama wananzelela ukuthi abakhe abantwana abakwazi ukubonga.
