uMthunywa
Ophezulu Stinta
Ngeviki eliphelileyo sitshiye uNgonyama laye esidla amathambo engqondo ezibuza eziphendula ngelokuthi kwakuvele kutheni efika kusigaba sokuthathana loMaMsie umuntu owayengavuthwanga ngaleyana ndlela.
Ukhumbula kuhle isikhathi esaphazamisa impilo yakhe. UMaMsie waqhatshwa esikolo lapho okwakufundisa khona uNgonyama, ezobambela umabhalane owayeyephetsheya. Ngaleso sikhathi uNgonyama wayengaka phakanyiswa ukuba ngumkhulu. Ukhumbula kuhle ukuthi ngaleso sikhathi insizwa zazingcwalela uMaMsie yena ke njengoba babehlala lokitshi linye yikho okwamenza wathola ithuba elide bendawonye. Nguye phela owayesemsiza ngenyawo ezilula njengoba uNgonyama wayelemota. Ngokuya kwesikhathi basebeze benxusana lasemicimbicimbini yokuzijabulisa.
Zatshova izinsuku laba ababili sebengabangane abamqoka, kulapho uNgonyama alandiselwa indaba ebuhlungu ngesimo sikaMaMsie. Wamazisa ukuthi wayeyintandana engalabani. Unina wabatshiya bebancinyane lomnewabo, uyise wazama ukubondla njengoba wayelesitolo kodwa ngeziphithiphithi zombangazwe satshabalala laleso sitolo.
Umnewabo owayebizwa asabele kwezelizwe waduma lazo wayavalelwa ejele enkulu yezibotshwa zombangazwe.
Ekuphumeni kwakhe lapho wanyamalala wezwakalela kweleZambia kwaba yikuphela kwakhe.
UNgonyama kulapho njalo alandiselwa khona ngokuswelakala kwenhlanhla okwehlela uMaMsie. Wayeseqale umnyaka wokuqala efundela ukuba ngumbalisikazi lapho atshiywa khona nguyise. Wabhekana lobunzima bokuthola imali zokubhadalela ekolitshi. Oyise abancane labadala batshaphaza impahla kayise bayiqeda du batsho labo ukuthi babengeke badlalise imali bebhadalela umntwana oyintombazana ozasuka khonapho ahle ayekwenda.
Esizwa lokhu uNgonyama wamzwela kakhulu umngane wakhe lo. Yayiqhubeka indaba kaMaMsie owaze wasuka ekhaya ezodinga umsebenzi edolobheni lakoBulawayo lapho afika wahle wasebenza esitolo samakula. Wayethi angatshayisa ntambama ayesikolo lapho ayefundela khona ukusebenzisa umtshina wokubhala. Wayezibhadalela ngemadlana ayeyihola.
Esizwa lokho uNgonyama kazange amlibale umuntu wesifazana ozimisele ngale indlela lokhu kwenza wamncoma wamkholwa njalo. UMaMsie wayewuphose wahlaba nta emzileni kaNgonyama. Wahle waphuphuma ngozwelo. Yilo kanye uzwelo lolu olwamenza wazithola esengoyacela umlilo.
Wayithanda intombi wabona kumele aphangise ayephule kulezi nsizi zobuntandane. Kulapho njalo azwisisa khona ukuthi yindaba uMaMsie lo wayengalabudlelwano obuhle lezihlobo zakhe. Zazingamphathanga kuhle ekukhuleni kwakhe, nguNgonyama owayephathelwe yibuthongo ecabanga ngesilingo somfazi ayesithethe ecabanga lokuthi wayewele kulo umjibila kambe kwakuliqiniso na okwakutshiwo nguMaMsie.
